მე გავიგე, რომ გერმანიის საგარეო საქმეთა მინისტრი ფაქტობრივად იგივე რიტორიკის გზავნილებს უშვებს, რაც ევროკავშირის 27-ვე ქვეყნის ელჩებს ჰქონდათ, როდესაც საქართველოს მთავრობას მიმართეს, - ასე შეაფასა ვახტანგ მეგრელიშვილმა ანალენა ბერბოკის განცხადება, რომელიც გერმანიის საგარეო საქმეთა მინისტრის თბილისში ჩამოსვლამდე რამდენიმე საათით ადრე გამოქვეყნდა. ამ თემაზე „გირჩის“ წევრმა „ქრონიკაში“ ისაუბრა.

„ვფიქრობ, რომ არაფერი იმ განცხადებაში, რომლითაც გერმანიის საგარეო საქმეთა მინისტრი გამოვიდა, საქართველოში დღეს გასაკვირი არ უნდა იყოს, თუ ამას ბუნებრივად არ გავაკეთებთ. სიტყვა-სიტყვით შემეძლო დავთანხმებოდი თითოეულ ამ განცხადებას, მართლა გვაქვს ეს ყველაფერი გასაკეთებელი. თითოეული განცხადება სწორია, განსაკუთრებით იმ გარემოების გათვალისწინებით, 1 კვირის წინ რომ იყო საქართველოში“, - განაცხადა მეგრელიშვილმა.

მან გააკრიტიკა კახა კალაძის პასუხი ბერბროკის განცხადებაზე და აღნიშნა, რომ როდესაც ქვეყანაში ასეთი მნიშვნელოვანი სტუმარი ჩამოდის, მისი კრიტიკისგან თავი მინიმუმ მანამდე უნდა შეიკავო, სანამ მას არ დაელაპარაკები.

საქართველოს დღეს გერმანიის საგარეო საქმეთა მინისტრი, ანალენა ბერბოკი ეწვევა. ორდღიანი ვიზიტის ფარგლებში, დაგეგმილია შეხვედრები პრეზიდენტთან, პრემიერთან და საგარეო საქმეთა მინისტრთან.

თბილისში ჩამოსვლამდე გამოქვეყნებულ განცხადებაში ბერბოკი აღნიშნავს, რომ საქართველო განიცდის ზეწოლას ქვეყნის შიგნიდან და გარედან. მის განცხადებაში ასევე ვკითხულობთ, რომ საქართველოს მთავრობასთან შეხვედრაზე ის განიხილავს იმ ნაბიჯებს, რომელიც ქვეყანას გადასადგმელი აქვს კანდიდატის სტატუსის მისაღებად.