„ვივამედის“ კლინიკური დირექტორი ზურაბ ჩხაიძე აცხადებს, რომ სახალხო დამცველის კონსილიუმთან მეტ თანამშრომლობას ისურვებდა.
ჩხაიძის თქმით, კარგი იქნება, რომ ისინი დაინტერესდნენ კვლევის შედეგებით და მოისმინონ კლინიკა „ვივამედის“ ექიმების აზრიც.
„შემიძლია, დაგიდასტუროთ ჩემი პატივისცემა კონსილიუმის ყველა წევრი ექიმის მიმართ, ისინი ნამდვილად თავისი საქმის სპეციალისტები არიან და ჩვენი პატივისცემა მათ, როგორც პროფესიონალებს, მაგრამ, რა თქმა უნდა, ჩვენ გვიჩნდება კითხვები. ზოგადად მიღებული წესია, რომ როცა კონსილიუმი იკრიბება, ეს ნიშნავს ექიმთა აზრთა ურთიერთგაზიარებას, შესაბამისად ნანახი იქნას პაციენტი, ნანახი იქნას მისი უახლესი კვლევის შედეგები, აუცილებლად გათვალისწინებული უნდა იყოს მკურნალი ექიმების აზრი, ჩვენი აზრი, შევჯერდეთ და შესაბამისად უნდა იყოს რეკომენდაციები ამ კონსილიუმის მხრიდან.
არც პირველ, არც ბოლო შემთხვევაში მსგავსი არაფერი ყოფილა, არც ანალიზები ყოფილა ნანახი, არც კვლევის შედეგები და სხვა ინსტრუმენტალური კვლევის შედეგები. უბრალოდ განცხადებების კეთება კლინიკის კიბეებზე და რაღაც ახალი დიაგნოზები, კუჭის პარეზი ახსენეს მგონი, რის საფუძველზე, როდესაც კვლევის შედეგი არ არის ნანახი. ჩვენ ვისურვებდით მათთან მეტ თანამშრომლობას, რომ დაინტერესდნენ კვლევის შედეგებით და მოისმინონ ჩვენი აზრიც“, – განაცხადა ზურაბ ჩხაიძემ.
რაც შეეხება კითხვას, იქნება თუ არა თქვენი რეკომენდაცია მიხეილ სააკაშვილის „ვივამედიდან“ გადაყვანა, – ზურაბ ჩხაიძის განცხადებით, ამ მიმართულებით ვერანაირ რეკომენდაციას ვერ გასცემენ.
„მე მოგახსენეთ კლინიკის პოზიცია, მოგახსენეთ, რომ კლინიკა სთავაზობს თანამედროვე მკურნალობის მეთოდებს, რაც მსოფლიოშია მიღებული, იქნება ეს ამერიკა, თუ ევროპის წამყვანი ქვეყნები, იმავე გაიდლაინებით ვხელმძღვანელობთ ჩვენ და ვთავაზობთ იმავე მკურნალობას. მეტსაც გეტყვით, შეთავაზებული იქნა, ყველამ მოისმინეთ ალბათ პენიტენციური სამსახურის, თუ მგონი პრემიერის მიერ, რომ ნებისმიერი ექიმი შეიძლება იქნას მოწვეული. ჩვენ მხოლოდ და მხოლოდ მივესალმებით ამას. ყველა კოლეგა დამეთანხმება, მხოლოდ მივესალმებით, რაც მეტი კონსულტანტი იქნება, რაც მეტი აზრთა ურთიერთგაზიარება იქნება.
მესმის პაციენტის მდგომარეობა, და ნებისმიერი პატიმრის მიზანი არის თავისუფლების მოპოვება, იგივე ადვოკატების მიმართულებაც, მათი ხაზიც, მაგრამ მინდა, კატეგორიულად აღვნიშნო, რომ ვერ დავუშვებთ, ეს მოხდეს კლინიკის ავტორიტეტის, ჩვენი ექიმების, პროფესიონალების კომპრომენტირების ხარჯზე. არ დავუშვებთ იმის ხარჯზე, რომ მოხდეს ამ ადამიანების, მათი პროფესიონალიზმის კომპრომენტირება. რა თქმა უნდა, ჩვენ ყველა პაციენტის ბედი გვაწუხებს, ამ შემთხვევაშიც, ძალიან გვაწუხებს პაციენტის ახლანდელი მდგომარეობა და მისი მომავალი ბედი, მაგრამ მიზანი, რაც აქვთ, ამ შემთხვევაში პაციენტს, რომ ეს მოხდეს კლინიკის ავტორიტეტის ხარჯზე, არც ერთ ვარიანტში ჩვენ ამას არ დავუშვებთ“, – განაცხადა ზურაბ ჩხაიძემ.
