თბილისის სახელმწიფო უნივერსიტეტის რექტორი ჯაბა სამუშია იმ სტუდენტებს შეხვდა, რომლებიც მომავალი სასწავლო წლის გაზაფხულის სემესტრს ევროპულ უნივერსიტეტებში გაატარებენ. 2022-2023 წლის შემოდგომის სემესტრის კონკურსის ფარგლებში, ერასმუს პლუსის (Erasmus +) საერთაშორისო კრედიტ-მობილობის პროგრამით სწავლების მობილობის გრანტი თსუ-ს 76-მა სტუდენტმა მოიპოვა შვიდივე ფაკულტეტის ბაკალავრიატის, მაგისტრატურისა და დოქტორანტურის საფეხურიდან. სტუდენტები ევროპის 15 ქვეყნის 32 წამყვან უნივერსიტეტში ისწავლიან.
შეხვედრაზე თსუ რექტორმა ჯაბა სამუშიამ ისაუბრა ევროპულ უნივერსიტეტებთან თბილისის სახელმწიფო უნივერსიტეტის პარტნიორული კავშირების გაფართოებაზე პროფესორებისა და სტუდენტების მობილობის ფარგლებში. მისი თქმით, მომდევნო წელს თსუ-ელები უფრო მეტი გაცვლითი პროგრამით ისარგებლებენ. მან ხაზი გაუსვა ევროკავშირის გაცვლით პროგრამებში ჩართული სტუდენტების მისიას: „მომავალი სემესტრიდან თქვენ იქნებით ჩვენი სამშობლოს წარმომადგენლები სხვადასხვა ქვეყანაში. ეს უდიდესი მისიაა და, ამავე დროს, დიდი პასუხისმგებლობაა, რადგან სწორედ თქვენ ხართ უნივერსიტეტისა და ჩვენი ქვეყნის ელჩები საერთაშორისო ასპარეზზე. ამავე დროს, მინდა იცოდეთ, რომ თქვენს უკან დგას უნივერსიტეტი, რომელიც მხარს გიჭერთ განვითარებასა და ყველა გამოწვევის დაძლევაში,“- განაცხადა ჯაბა სამუშიამ.
თბილისის სახელმწიფო უნივერსიტეტი 2015 წლიდან დღემდე ევროპის 29 ქვეყნის 150-ზე მეტ უნივერსიტეტთან ერთად ევროკავშირის მიერ დაფინანსებულ 420-ზე მეტ პროექტში მონაწილეობს
