საქართველოში აშშ-ის ელჩი კელი დეგნანი აცხადებს, რომ მიესალმებიან „ნაციონალური მოძრაობის“ მიერ 19 აპრილის შეთანხმების ხელმოწერას.

დეგნანის თქმით, შეთანხმება წარმოადგენს რეფორების საგზაო რუკას, რაც ძალიან მნიშვნელოვანი და საჭიროა საქართველოს სამომავლო გზის გასაძლიერებლად.

„ჩვენ მივესალმებით „ნაციონალური მოძრაობის“ მიერ ხელშეკრულების ხელმოწერას. ჩვენ მოვუწოდებდით „ნაციონალურ მოძრაობას“ გარკვეული დროის განმავლობაში, რომ ხელი მოეწერა შეთანხმებისთვის. ეს კარგი ნიშანია, რადგან ეს წარმოადგენს მნიშვნელოვანი რეფორმების საგზაო რუკას, რომელიც ქვეყანას სჭირდება. ყველაზე მნიშვნელოვანი არის, ის რომ ეს შეთანხმება შედგა ქართველებს შორის, ქართველ პოლიტიკურ ლიდერებს შორის. კარგია, რომ ამდენმა მხარემ ხელი მოაწერა შეთანხმებას რეფორმების განხორციელებისთვის, რაც ძალიან მნიშვნელოვანი და საჭიროა საქართველოს სამომავლო გზის გაძლიერებისთვის. ეს რეფორმები საშუალებას იძლევა, უფრო ძლიერი ავტონომია იყოს უკეთესი საარჩევნო პროცესისთვის. რეფორმები ეხება თითოეული ქართველის ცხოვრებას“, – განაცხადა კელი დეგნანმა.

„ნაციონალური მოძრაობის“ თავმჯდომარემ, ნიკა მელიამ გუშინდელ ბრიფინგზე განაცხადა, რომ პარტია შარლ მიშელის შეთანხმებას ხელს აწერს.

ევროპული საბჭოს პრეზიდენტ შარლ მიშელის დოკუმენტი 19 აპრილს გაფორმდა. შარლ მიშელის მიერ პარტიებისთვის წარდგენილ დოკუმენტზე „საქართველოს სამომავლო გზა“ ხელმოწერა ორბელიანების სასახლეში გაიმართა. ამასთან, პარტია „ნაციონალური მოძრაობა“ არ შეუერთდა დოკუმენტს. მოგვიანებით, „ქართულმა ოცნებამ“ დოკუმენტის ანულირების შესახებ განაცხადა და მიზეზად დაასახელა ის, რომ „ნაციონალური მოძრაობა“ უარს აცხადებდა შეთანხმების ხელმოწერაზე.