აშშ-ის პრეზიდენტი ჯო ბაიდენი არ იხსნის პასუხისმგებლობას ვაშინგტონის გადაწყვეტილებებზე და იმაზე, რაც ახლა ავღანეთში ხდება, - ამის შესახებ თეთრ სახლში გამართულ ბრიფინგზე ეროვნული უსაფრთხოების საკითხებში ბაიდენის თანაშემწემ, ჯეიკ სალივანმა განაცხადა.

კითხვაზე, იღებს თუ არა ბაიდენი საკუთარ თავზე პასუხისმგებლობას არა მხოლოდ ავღანეთიდან ამერიკული ჯარების გაყვანაზე, არამედ „იმ ქაოსზეც, რომელიც ევაკუაციის დროს ხდებოდა“, სალივანმა განაცხადა, რომ ბაიდენი იღებს პასუხისმგებლობას ყველა გადაწყვეტილებაზე, რომელიც აშშ-მა ავღანეთთან დაკავშირებით მიიღო.

მისივე თქმით, ამ პასუხისმგებლობას იღებენ ეროვნული უსაფრთხოების საკითხებზე მომუშავე გუნდის წევრები, მრჩევლები, თანაშემწეები და ადმინისტრაციის სხვა თანამშრომლები.

„ჩვენ, როგორც ეროვნული უსაფრთხოების საკითხებზე მომუშავე გუნდი, კოლექტიურად ვიღებთ პასუხისმგებლობას როგორც კარგ გადაწყვეტილებებზე, ასევე ისეთებზე, რომლებსაც იდეალური შედეგები არ მოაქვთ“, - განაცხადა ბაიდენის თანაშემწემ.

15 აგვისტოს „თალიბანის“ წევრები ქაბულში შევიდნენ. ამის შემდეგ აშშ-ის საელჩოდან დიპლომატების ევაკუაცია ვერტმფრენით განხორციელდა. ავღანეთის პრეზიდენტი აშრაფ ღანი ტაჯიკეთში გაიქცა.

1-ელ მაისს შეერთებულმა შტატებმა ავღანეთიდან ჯარის გაყვანა ოფიციალურად დაიწყო. 14 აპრილს აშშ-ის პრეზიდენტმა, ჯო ბაიდენმა ავღანეთიდან ამერიკული ჯარების გამოყვანა გამოაცხადა.

ავღანეთის პრეზიდენტმა, აშრაფ ღანიმ ქვეყანაში უსაფრთხოების მკვეთრად გაუარესებული მდგომარეობა აშშ-ის მიერ ჯარების გაყვანის მოულოდნელ გადაწყვეტილებას დაუკავშირა.