რადგანაც ბაზიდან აეროპორტამდე ჩვენ უიარაღოდ უნდა გავიდეთ, ამისთვის გვჭირდება სამხედრო გაცილება და ამას თურქები დაგვპირდნენ. დაიგეგმება კონკრეტულად ქართული ბორტი, რომელიც ჩვენ წაგვიყვანს, - ამის შესახებ „ქრონიკაში“ სატელეფონო ჩართვისას ავღანეთში მყოფმა ყოფილმა სამხედრომ, ლევან ჯანგირაშვილმა განაცხადა.

მან ავღანეთში ამ დროისთვის არსებულ მდგომარეობაზე ისაუბრა და ასევე, თქვა, თუ როგორაა შესაძლებელი იქ დარჩენილმა ქართველებმა ქვეყანა უსაფრთხოდ დატოვონ.

„პასუხისმგებლობა, ძალაუფლება სრულად თალიბანის ხელშია. ქალაქში არის მათი შესამოწმებელი პუნქტები. არანაირი აგრესიით არ გამოირჩევიან. აჩერებენ მანქანებს, ამოწმებენ და ყველას ეუბნებიან, რომ ისინი იქ არიან მათი უსაფრთხოების დასაცავად - ნუ გეშინიათ. ჩვენი ბაზის შესასვლელშიც ისინი დგანან, ბაზის უსაფრთხოებას იცავენ. თუმცა, ქალაქში ძალიან ბევრი შეიარაღებული პირი დადის, მაროდიორები და რა ვიცი! ყველას იარაღი უკავია. ანუ, ყველა თალიბანის წარმომადგენელი არ არის და აქედან გამომდინარე, დამცავი საშუალებების გარეშე გადაადგილება ძალიან სახიფათოა.

რადგანაც ბაზიდან აეროპორტამდე უიარაღოდ უნდა გავიდეთ, ამისთვის გვჭირდება ჩვენ სამხედრო გაცილება და ამას თურქები დაგვპირდნენ. დაიგეგმება კონკრეტულად ქართული ბორტი, რომელიც ჩვენ წაგვიყვანს. მთავარია, ჩვენ აეროპორტში შევიდეთ, რომელიც მეტ-ნაკლებად უსაფრთხოა. 22 კაცი ვართ დარჩენილი.

გუშინ, სანამ თალიბანი შემოვიდოდა, ქალაქში საშინელი ქაოსი იყო. არაფერი აღარ მუშაობდა. ხალხი გარბოდა. საშინელი საცობები იყო. ჩვენც მოვყევით იმ საცობში 6 საათი გარეთ ვიყავით. მოსახლეობა გარეთ არ გამოდის. შეშინებულია, რადგან როდესაც პირველად თალიბანი ხელისუფლებაში მოვიდა, სასტიკი მეთოდებით გამოირჩეოდნენ, თუმცა ახლა სამოქმედო გეგმა რადიკალურად შეცვლილი აქვთ“, - განაცხადა ყოფილმა სამხედრომ, ლევან ჯანგირაშვილმა.

15 აგვისტოს „თალიბანის“ წევრები ქაბულში შევიდნენ. ამის შემდეგ აშშ-ის საელჩოდან დიპლომატების ევაკუაცია ვერტმფრენით განხორციელდა. ავღანეთის პრეზიდენტი აშრაფ ღანი ტაჯიკეთში გაიქცა.

ავღანეთის 34 პროვინციის ადმინისტრაციული ცენტრებიდან 27 უკვე „თალიბების“ ხელშია. ქაბულამდე, დაჯგუფებამ ნანგარჰარის პროვინციის დედაქალაქი, ჯალალაბადი აიღო და როგორც მედია წერს, დაჯგუფებას ამ ქალაქზე კონტროლის დასამყარებლად, ბრძოლაც კი არ დასჭირვებია.

ამერიკის პრეზიდენტის, ჯო ბაიდენის გადაწყვეტილებით, ავღანეთში, დამატებით, 1 000 სამხედრო გაიგზავნება.

1-ელ მაისს შეერთებულმა შტატებმა ავღანეთიდან ჯარის გაყვანა ოფიციალურად დაიწყო. 14 აპრილს აშშ-ის პრეზიდენტმა, ჯო ბაიდენმა ავღანეთიდან ამერიკული ჯარების გამოყვანა გამოაცხადა.

ავღანეთის პრეზიდენტმა, აშრაფ ღანიმ ქვეყანაში უსაფრთხოების მკვეთრად გაუარესებული მდგომარეობა აშშ-ის მიერ ჯარების გაყვანის მოულოდნელ გადაწყვეტილებას დაუკავშირა.