ესპანეთი მყარად უჭერს მხარს საქართველოს ევროატლანტიკურ მისწრაფებებს, როგორც ნატოში ასევე ევროკავშირში. ასევე მხარს უჭერს საქართველოს სუვერენიტეტსა და ტერიტორიულ მთლიანობას - ამის შესახებ „ქრონიკას“ ესპანეთის სამეფოში საქართველოს საგანგებო და სრულუფლებიანმა ელჩმა ილია გიორგაძემ პრემიერ-მინისტრ ირაკლი ღარიბაშვილის ესპანეთში ვიზიტზე საუბრისას განუცხადა.

„დღეიდან იწყება ბატონი ირაკლი ღარიბაშვილის ვიზიტი ესპანეთის სამეფოში. მოგეხსენებათ, საქართველო არის მოწვეული ქვეყანა ყველაზე დიდ საერთაშორისო ტურიზმის გამოფენაზე. ბატონი ირაკლი ღარიბაშვილი ესპანეთის მეფესთან ერთად გახსნის ამ გამოფენას. აგრეთვე იქნებიან სხვადასხვა ქვეყნებიდან 30-მდე ტურიზმის მინისტრი. ეს ერთ-ერთი ყველაზე დიდი და მნიშვნელოვანი გამოფენაა ტურიზმის კუთხით. გარდა ამისა, დაგეგმილია ორმხრივი შეხვედრები ესპანეთის კონგრესის თავმჯდომარესთან, სადაც განხილული იქნება ორმხრივი ურთიერთობები და საპარლამენტო თანამშრომლობა ესპანეთსა და საქართველოს შორის. ასევე დაგეგმილია შეხვედრა ესპანეთის პრემიერ-მინისტრთან პედრო სანჩესთან. როგორც მოგეხსენებათ, ესპანეთი მყარად უჭერს მხარს საქართველოს ევროატლანტიკურ მისწრაფებებს როგორც ნატოში, ასევე ევროკავშირში და რაც მთავარია, ძალიან მყარად უჭერს მხარს საქართველოს სუვერენიტეტსა და ტერიტორიულ მთლიანობას. შესაბამისად, ეს ვიზიტი კიდევ უფრო გააღრმავებს უკვე არსებულ მეგობრულ და კარგ ურთიერთობებს ესპანეთის სამეფოსთან“,-განაცხადა ესპანეთის სამეფოში საქართველოს საგანგებო და სრულუფლებიანმა ელჩმა ილია გიორგაძემ.

პრემიერ-მინისტრი ირაკლი ღარიბაშვილი ორდღიანი ვიზიტით ესპანეთის სამეფოს ეწვია. მთავრობის მეთაური დღეს მადრიდში საერთაშორისო ტურისტული გამოფენის FITUR-2021-ის გახსნას დაესწრება, რომელშიც საქართველო პარტნიორი ქვეყნის სტატუსით მონაწილეობს.