მელია გახლავთ ძალიან დიდი ოპოზიციური პარტიის ხელმძღვანელი. შესაბამისად, ძალიან მნიშვნელოვანია, რომ იგი იყოს პარლამენტში და თავის ამომრჩეველს პარლამენტში წარმოადგენდეს. მე იმედი მაქვს, რომ ის აღმოჩნდება პარლამენტში, - ამის შესახებ საქართველოში აშშ-ის ელჩმა, კელი დეგნანმა ისაუბრა.

დიპლომატის თქმით, ამნისტიის კანონპროექტის დეტალებზე მსჯელობა ჯანსაღი პროცესია, მთავარი კი ის არის, რომ მრავალპარტიული პარლამენტი შედგა.

„შეთანხმების მიღწევა იყო წინ გადადგმული ნაბიჯი საქართველოს დემოკრატიულ განვითარებაში, რომლის შედეგადაც პარტიები შევიდნენ პარლამენტში და ჩვენ ვხედავთ თუ როგორ მუშაობს მრავალპარტიული პარლამენტი. რა თქმა უნდა ამნისტიის კანონპროექტის დეტალები არის ის საკითხი, რაც უნდა განიხილონ და მივიდნენ საბოლოო გადაწყვეტილებამდე. ამ საკითხს განიხილავენ და ეს არის ჯანსაღი პროცესი. მნიშვნელოვანი გახლავთ ის, რომ პარტიები შევიდნენ პარლამენტში და ახლა არიან იქ, სადაც უნდა იყვნენ და განახორციელონ ის მნიშვნელოვანი რეფორმები, რაც გულისხმობს საარჩევნო და სასამართლო რეფორმებს. ეს გააუმჯობესებს ზოგადად პირობებს, რომ ჩატარდეს უკეთესი არჩევნები და აღდგეს საზოგადოების ნდობა როგორც არჩევნების, ასევე სასამართლო გადაწყვეტილების მიმართ. კიდევ ერთხელ შევაქებ იმ პოლიტიკური პარტიების გამბედაობას, რომლებმაც ხელი მოაწერეს ამ შეთანხმებას“, - განაცხადა დეგნანმა.

ნიკა მელიამ აზრი შეიცვალა და განაცხადა, რომ ამნისტიის კანონპროექტის გაწვევის შემთხვევაში ევროკავშირის მიერ შეთავაზებულ გირაოს დათანხმდება. ოპოზიციამ და ხელისუფლებამ ამნისტიის საკითხზე შეთანხმებას ვერ მიაღწიეს და საკუთარ კანონპროექტებს ცალ-ცალკე დაარეგისტრირებენ.