ევროკომისიაში განაცხადეს, რომ ორგანიზაცია მაქსიმალურად ცდილობს წევრ სახელმწიფოებს პრობლემა არ შეექმნათ და ვაქცინა ყველასთვის ხელმისაწვდომი იყოს. ახალ კონტრაქტს ხელი CureVac-თან მოეწერება. გერმანულ კომპანიასთან შეთანხმების თანახმად, ევროკოსიამ 405 მილიონი დოზა ვაქცინა უნდა მიიღოს.

„კორონავირუსი ევროპის კონტინენტზე ისევ სწრაფად ვრცელდება. პანდემიის დასასრულებლად ჩვენ გვჭირდება უსაფრთხო და ეფექტიანი ვაქცინა. მოხარული ვარ, მოგაწოდოთ ინფორმაცია ახალი შეთანხმების შესახებ. ჩვენ 17 ნოემბერს გავაფორმებთ კონტრაქტს კომპანია CureVac-თან. ჩვენ რამდენიმე თვის წინ ევროპის საინვესტიციო ბანკთან ერთად წვლილი შევიტანეთ მომავალი ვაქცინის მიღების პროცესში. ხელშესახები პროგრესი უკვე არის. თუ ეს ვაქცინა COVID-19-ის წინააღმდეგ უსაფრთხო და ეფექტიანი იქნება, მაშინ ევროკავშირის წევრი სახელმწიფოები მას თანაბრად და სოლიდარობის პრინციპით ერთდროულად მიიღებენ. ჩვენ ასევე ვმუშაობთ მეექვსე კონტრაქტზე, რათა უზრუნველყოფილი იქნას მოდერნას მიერ წარმოებული ვაქცინის მიღებაც. იმედი გვაქვს, რომ ამ კონტრაქტზე მუშაობას ძალიან მალე წარმატებით დავასრულებთ.

ამ ეტაპზე ჩვენ არ ვიცით, თუ რომელი ვაქცინა იქნება უსაფრთხო და ეფექტიანი. „ევროპის წამლის სააგენტო” მათ ავტორიზაციას დეტალური ანალიზისა და შეფასების შემდეგ მისცემს. ჩვენ ვმუშაობთ კოვაქსთან (Covax) დაბალი და საშუალო შემოსავლის მქონე ქვეყნებისთვის ვაქცინის მიწოდების შესახებ. გვინდა დარწმუნებულები ვიყოთ, რომ უსაფრთხო და ეფექტიანი ვაქცინა ყველასთვის ხელმისაწვდომი იქნება”, - განაცხადა ევროკომისიის პრეზიდენტმა ურსულა ფონ დერ ლაიანმა.

კოვაქსი გლობალური ვაქცინების ორგანიზაციის ნაწილია და ქვეყნებს შორის კორონავირუსის ვაქცინის სამართლიან გადანაწილებაზეა პასუხისმგებელი. CureVac ბიოფარმაცევტული კომპანიაა. მისი სათავო ოფისი გერმანიის ქალაქ ტუბინგენში მდებარეობს.

კომპანიამ კოვიდ-19-ზე ვაქცინის შესაქმნელად მუშაობა იანვარში დაიწყო და მარტში ევროკომისიიდან ფინანსური დახმარების სახით 80 მილიონი ევრო მიიღო. კომპანიამ mRNA ვაქცინის კლინიკური კვლევის პირველი ეტაპი ივნისში დაიწყო. CurVac-მა სექტემბერში გერმანიის განათლებისა და კვლევების სამინისტროდან გრანტის სახით 252 მილიონი ევრო მიიღო და პერუსა და პანამაში კანდიდატი ვაქცინის კლინიკური კვლევის მეორე ფაზაზე გადავიდა. კომპანიის წარმომადგენლები აცხადებენ, რომ Pfizer-ის ვაქცინასთან შედარებით მათ გაცილებით დიდი უპირატესობა აქვთ.

CureVac-ის კანდიდატი ვაქცინის შენახვა არ არის საჭირო ისეთ დაბალ ტემპერატურაზე, როგორც ეს Pfizer-ის ვაქცინის (-80 ° C) შემთხვევაშია. CureVac-ის კანდიდანტი ვაქცინის შენახვა 30 დღის განმავლობაში +5°C-ზეა შესაძლებელი და 24 საათი ოთახის ტემპერატურაზე. კლინიკური კვლევის პირველ ფაზაზე კომპანიას ჰყავდა 18-დან 60 წლამდე ასაკის მოხალისეები. მათ კანდიდატი ვაქცინის 2-დან 12 მიკროგრამამდე დოზა 2 ჯერ მიიღეს. 28 დღის შემდეგ ვაქცინისგან გამოწვეული სერიოზული პრობლემები არ დაფიქსირებულა. ვაქცინის გამოცდის მესამე ფაზის დაწყება წლის ბოლომდეა დაგეგმილი. მესამე ფაზის დროს კანდიდატ ვაქცინას ათასობით ადამიანზე გამოსცდიან.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.