„არ არის გამორიცხული, რომ ევროპელმა დამსვენებლებმა თავიანთი ჩვეულებრივი არჩევანი შეცვალონ იმის გამო, რომ საქართველოს კურორტები ყველაზე უსაფრთხო და კარგად მომზადებული იქნება უსაფრთხოების თვალსაზრისით“, – ამის შესახებ ეკონომიკისა და მდგრადი განვითარების მინისტრმა, ნათია თურნავამ საქართველოს პირველი არხის გადაცემაში „მოამბე“ განაცხადა.

„არ არის გამორიცხული, რომ მათ თავიანთი ჩვეულებრივი არჩევანი შეცვალონ ჩვენი აჭარის, გურიის თუ სამეგრელოს კურორტების სასარგებლოდ. დღეს პრიორიტეტები იცვლება და პრიორიტეტი არა მხოლოდ კომფორტია, არამედ უსაფრთხოება და ჩვენ შეგვიძლია, დამსვენებლებს ეს უსაფრთხოება შევთავაზოთ. ის ფაქტი, რომ 15 ივნისიდან შიდა ტურისტებისთვის ტურისტულ ინდუსტრიას ვხსნით, ჩვენს შიდა დამსვენებელს საშუალებას მისცემს, მათ შორის, საზღვაო კურორტებს ესტუმრონ. ყველაფერს გავაკეთებთ იმისთვის, რომ საზღვრების გახსნამდე ჩვენი საზღვაო კურორტები უსაფრთხოებისთვის აუცილებელი ყველა ატრიბუტით აღიჭურვოს. ასევე, ის სერიოზული შეღავათები, რაც ამ ინდუსტრიას პაკეტურად შევთავაზეთ, რა თქმა უნდა, საზღვაო კურორტებსაც შეუმსუბუქებს მდგომარეობას, რომ ისინი უფრო მალე მოემზადონ გასახსნელად “, – განაცხადა თურნავამ.