ხელისუფლებამ კიდევ ერთხელ გაწირა ხალხი, ჩვენი არაერთი მოწოდებისა, მან არ დაკეტა საზღვარი ირანთან. შედეგად, კორონავირუსი უკვე საქართველოშია, - ამის შესახებ განცხადება „ლეიბორისტული პარტიის" ლიდერმა, შალვა ნათელაშვილმა საგანგებოდ გამართულ ბრიფინგზე განაცხადა.

„გათვლა ძალიან მარტივი გახლავთ. გადაერთოს ხალხის ყურადღება რეჟიმის შეცვლიდან აქტიური საპროტესტო მიტინგებიდან და აქციებიდან სასიკვდილო ინფექციაზე. მაგრამ, ვარწმუნებ ივანიშვილის რეჟიმს, ვერანაირი ვირუსომანი მათ ვერ გადაარჩენს. ახლა მაინც, კეთილი ინებეთ დაურიგეთ მოსახლეობას პირბადეები, შეწყვიტეთ სწავლა სკოლებში, საბავშვო ბაღებსა და უმაღლეს სასწავლებლებში.

სამწუხაროა, რომ ელემენტარულ ჭეშმარიტებებზე გვჭირდება აქციები, მიტინგები, ბრიფინგები, რომ სასიკვდილო ვირუსი მაინც გააჩერონ. ესეც პროპორციული არჩევნები ხომ არ იყო?! ყველა ქვეყანამ, რუსეთმაც კი, საერთოდ დაკეტა საზღვარი ჩინეთთან, ირანთან, სამხრეთ კორეასთან და ყველა იმ რეგიონში, სადაც ეს ვირუსი წარმოიშვა და გავრცელდა. ჩვენი ხალხი პანიკიორი არ გახლავთ, ეს მთელმა მსოფლიომ იცის. ეს ვირუსი ჩვეულებრივი გრიპია, სასიკვდილო შედეგები ისეთივეა, როგორც ჩვეულებრივ გრიპში", - ამბობს ნათელაშვილი.

შეგახსენებთ, რომ საქართველოში კორონავირუსის პირველი შემთხვევა გუშინ, დაფიქსირდა. დაავადებული საქართველოს მოქალაქე, 50 წლის კაცია, რომელიც გუშინ აზერბაიჯანის გავლით ირანიდან შემოვიდა.