მსგავსი სისულელე არ მსმენია, კომედიურ ჟანრში გადავდივართ, – ამის შესახებ საქართველოს პარლამენტის იურიდიულ საკითხთა კომიტეტის თავმჯდომარის მოადგილე დავით მათიკაშვილმა განაცხადა დამოუკიდებელი დეპუტატის, ეკა ბესელიას განცხადებასთან დაკავშირებით, რომ გარკვეული პირების პირადი ცხოვრებით შანტაჟი ახლაც ხდება.
„მსგავსი რამ ვერ იქნებოდა. ამ ტრაგიკომიკურ სპექტაკლში ვერ მივიღებ მონაწილეობას. თქვას ბესელიამ, თვითონ რაში სჭირდება, რადგან მსგავსი რამ არ მსმენია. სერიოზული კითხვები დამისვით“, – განაცხადა დავით მათიკაშვილმა ჟურნალისტებთან საუბრისას.
ცნობისთის, ეკა ბესელიამ განაცხადა, რომ პირადი ცხოვრების ამსახველი ფარული ჩანაწერებით ადამიანებზე ზეწოლა და შანტაჟი ახლაც ხდება და ამის რამდენიმე ფაქტი იცის.
„საკუთარ შინაგან გაუბედაობას თუ მუხრუჭებს ყველამ თავად უნდა გადააბიჯოს. ეს ისეთი საკითხია, რომელზეც სხვა ვერავინ ისაუბრებს, გარდა ადამიანებისა, რომლებიც აღნიშნული ყველაზე ამორალური მეთოდების გამოყენებით გარკვეულ გავლენას ექვემდებარებიან. არ იქნება ეთიკური, ვისაუბრო იმ ადამიანების ნაცვლად. თავისთავად იმის დაშვება, რომ შესაძლებელია, დღესაც წინა რეჟიმის მსგავსად, ძველმა სისტემამ შეინარჩუნოს თავი ისე, რომ ჩვენი ხელისუფლების პირობებში მოხდა იმავე მეთოდების გამოყენება, ჩემთვის ყველაზე ამაზრზენი რამაა. ამიტომ მიმაჩნია, რომ როგორც წინა ხელისუფლება იყო შესაცვლელი, ეს ხელისუფლებაც შესაცვლელია, რომელმაც ვერ შეძლო, გაემართა სისტემა იმგვარად, რომ ადამიანებზე ასეთი ზეწოლა არ ხდებოდეს.
არ ვამბობ, რომ ეს მასიურად ხდება. ყოველ შემთხვევაში, მე რამდენიმე შემთხვევაზე მაქვს ინფორმაცია, მაგრამ თავად უნდა ისაუბრონ. ის თემა არ არის, სადაც შეიძლება, მე დავარღვიო ვინმეს პირადი სივრცე. ამას ძალიან მტკივნეულად განვიცდი, რადგან ეს იყო პირველი, რაც უნდა შეგვეცვალა. არ აქვს მნიშვნელობა, მასშტაბი რამხელა იქნება. სადაც ერთი, ორი, სამი შემთხვევა იქნება და თვალს დავხუჭავთ, ეს ძალიან სწრაფად გაიზრდება. ვიცი, რომ არსებობს რამდენიმე ასეთი ფაქტი“, – განაცხადა ეკა ბესელიამ.
