სად გადანაწილდებიან გლდანის ციხიდან მსჯავრდებულები. საპყრობილიდან პატიმრების გადაყვანის პროცესი გუშინ დაიწყო. პირველ ეტაპზე გლდანიდან 145 მსჯავრდებული ორთაჭალის მეთორმეტე, მსუბუქი რეჟიმის დაწესებულებაში გადაიყვანეს. სასჯელაღსრულების მინისტრის თქმით, ამ დღეებში საპყრობილეებს კიდევ რამდენიმე ასეული პატიმარი დატოვებს და მათ სხვადასხვა, ნახევრად ღია ტიპის დაწესებულებებში გადაიყვანენ. დღეს კი მუშაობას იწყებს პრობაციის მოხსნის კომისიის ახალი შემადგენლობა. სოზარ სუბარის განცხადებით, ვისაც კანონი აძლევს უფლებას და სასჯელის ნახევარი მოხდილი აქვს, შეუძლია განცხადება დაწეროს. კომისია იმუშავებს სრული დატვირთვით და ძალიან ბევრ პრობაციონერს მოეხსნება პრობაცია.
