„ეს არ არის " ჩეთემ ჰაუზის" ოფიციალური პოზიცია და არც მათი ანგარიში არ არის. ეს არის ერთი კონკრეტული მკვლევარის და მათ წრეებთან დაახლოებული ექსპერტის მიერ მომზადებული კვლევა, რომელიც ერთი ადამიანის კვლევა უფროა" განაცხადა ტვ პირველის ეტერში უმრავლესობის ლიდერმა არჩილ თალაკვაძემ.

მისი თქმით, „ნაციონალურმა მოძრაობამ" ერთი დღეც ვერ მოიცადა, როგორც ეს ღირსეულ პოლიტიკურ ძალას შეეფერება და ისიც ვერ შეძლო, თავიანთი მხარდამჭერებისთვის დამარცხებაზე განმარტებები გაეკეთებინა. მეორე დღესვე რაღაც კვლევები გამოიტანა. მისივე თქმით, პირველი  იყო  ,,იპსოს"-ის კვლევა, რომელზეც საფრანგეთის ოფისმა განმარტა, რომ მას არ ჩაუტარებია.

„პირველი კვლევა იყო, რუსულ-უკრაინული ,,იპსოსის". ამაზე განმარტება თავად გააკეთა ამ ოფისმა.  ფაქტია, რომ რუსეთში ოპერირებს ასევე ოფისი. მათ არ თქვეს მონაცემები „ქართული ოცნების" და „ნაციონალური მოძრაობის" კანდიდატებთან დაკავშირებით. არ თქვეს იმიტომ, რომ ჩვენ ვიცოდით, მათ წინასწარ ჰქონდათ ინფორმაცია რომ ჩვენ ვიმარჯვებდით და ზუსტად ეს იყო მიზეზი რატომაც დამალეს.

ზუსტად ერთ დღეში ზუგდიდის საზოგადოებამ აჩვენა რამდენად რეალობას შეესაბამებოდა ეს კვლევა. მერე წამოვიდა ვითომ ,, ჩეთემ ჰაუზის" ოფიციალური შეფასებები ". პირდაპირ გეტყვით რომ ეს არ არის ,, ჩეთემ ჰაუზის" ოფიციალური პოზიცია და არც მათი ანგარიში არ არის. ეს არის ერთი კონკრეტული მკვლევარის და მათ წრეებთან დაახლოებული ექსპერტის მიერ მომზადებული კვლევა, რომელიც ერთი ადამიანის კვლევა უფროა" - განაცხადა არჩილ თალაკვაძე.

მისი თქმით, რაც ხდება, ეს არის მორიგი უსუსური შეტევა ბიძინა ივანიშვილის წინააღმდეგ.

„ეს მხოლოდ იმიტომ კი არ ხდება, რომ ბიძინა ივანიშვილი საქველმოქმედო საქმიანობას ეწევა, 3 მილიარდი აქვს დახარჯული და საზოგადოებისთვის საჭირო  პროექტებს აფინანსებს, სინამდვილეში ეს ყველაფერი ხდება იმიტომ, რომ ბიძინა ივანიშვილმა ნაციონალური მოძრაობა გაისტუმრა პოლიტიკიდან მშვიდობიანად, დემოკრატიული არჩევნების გზით ისე, რომ დღემდე ვერ ახერხებენ დაბრუნებას. მთავარი ბერიერი დღეს, რატომაც ეს დესტრუქციული ძალა ვერ ბრუნდება ხელისუფლებაში არის ბიძინა ივანიშვილი და ზუსტად ამიტომ, მათი მთელი ტაქტიკა არის აწყობილი იმაზე, რომ ისაუბრონ მხოლოდ ბიძინა ივანიშვილზე. მათ არ შეუძლიათ პოლიტიკურ დიალოგში შემოსვლა. პარლამენტში პრაქტიკულად ყველა პოლიტიკურ დებატს აგებენ, ამიტომ ერთადერთი მესიჯი, რაც დაზეპირებული აქვთ არის ის, რომ ყველაფერი უნდა დააბრალონ ბიძინა ივანიშვილს. შექმნეს ერთგვარი ბიძინა ივანიშვილის პრეზუმპცია, სადაც, თუ რამე კარგი ხდება ქვეყანაში კარგია, მაგრამ თუ რამე კარგი ხდება, რომელიც შეიძლება ბიძინა ივანიშვილს უკავშირდებოდეს, ის არ არის კარგი. მათი ერთადერთი სურვილია შური იძიონ, მათ არც საქართველოს, არც ზუგდიდის მუნიციპალიტეტის და არანაირი ინტერესები არ აქვთ რეალურად. ეს არის პოლიტიკური შურისძიების სურვილი, რომელიც არჩევნებიდან არჩევნებამდე ნაციონალურ მოძრაობას გამოარჩევს სხვა პოლიტიკური პარტიებისგან „ - განაცხადა არჩილ თალაკვაძემ.