თუკი ჩემი პოზიცია არ იქნება  გაზიარებული, ჩემს ადგილს ვხედავ მხოლოდ ერთადერთ გუნდში, მას ჰქვია კაკულიების გუნდი, ეს არის ჩემი მეუღლე და ჩემი შვილი, – ამის შესახებ იუსტიციის მინისტრმა, თეა წულუკიანმა განაცხადა კითხვაზე, თუ არ იქნება მისი პოზიცია გაზიარებული ხედავს თუ არა საკუთარ ადგილს ახალ პოლიტიკურ გუნდში.

წულუკიანის თქმით, რა პოზიციაზეც არ უნდა იყოს, მისი პოლიტიკური ადგილი „ქართულ  ოცნებასთანაა“ და ის ყოველთვის „ქართული ოცნების“ ამომრჩეველი იქნება.

„რაც შეეხება პოლიტიკური ადგილს, ჩემი პოლიტიკური ადგილი არის და ყოველთვის იქნება „ქართულ ოცნებასთან“, რა პოზიციაზეც არ უნდა ვიყო. თუ არც ერთ პოზიციაზე არ ვიქნები, ისევ ვიქნები „ქართული ოცნების“ ამომრჩეველი და როგორც აქამდე ვიბრძოდი, მომავალშიც ასე ვიბრძოლებ, რომ „ქართული ოცნება“ იყოს გამარჯვებული და არ დაბრუნდეს უბედურება, რომელსაც ჩვენ ერთად ვებრძოდით“, – განაცხადა თეა წულუკიანმა.

მისი თქმით, თუ დღეს მიიღწევა შეთანხმება საკითხზე, რომელზეც არის საუბარი და მიმდინარეობს დისკუსია, სამუშაო პროცესი ჩვეულებრივ გაგრძელდება.

„თუ დღეს ჩვენ მივაღწევთ შეთანხმებას, შემდეგ გაგრძელდება ჩვეულებრივი სამუშაო პროცესი“, – განაცხადა თეა წულუკიანმა.