საფრანგეთში მცხოვრები ქართველი ემიგრანტები ბექა გოგოსაშვილი და თორნიკე ლაშხი სოციალურ ქსელ „ფეისბუკის" მეშვეობით ავრცელებენ ინფორმაციას, რომლის თანახმადაც შაბათს ღამით ბელგიაში, ქალაქ ლიეჟში დათა ახალაია, გია უდესიანი და რამდენიმე ქართველი პოლიციამ დააკავა.
„რეზონანსი" შეეცადა იმის გარკვევას, თუ რამდენად შეესაბამება ეს ინფორმაცია სიმართლეს „ნაციონალური მოძრაობის" წარმომადგენლებთან, თუმცა ფაქტი არავინ არ დაადასტურა.
ფრაქცია „ერთიანი ნაციონალური მოძრაობის" წევრი სალომე სამადაშვილი „რეზონანსთან" საუბრისას აცხადებს, რომ არაფერი იცის ამ ფაქტის შესახებ:
„ვერ გეტყვით. მე არანაირი ინფორმაცია ამ საკითხზე არ მაქვს-ვერაფერს ვერც დაგიდასტურებთ და ვერც უარვყოფ, რადგან უბრალოდ არ მაქვს ინფორმაცია", - თქვა სალომე სამადაშვილმა.
თავად „ნაცმოძრაობაში" კი განაცხადეს, რომ უდესიანისა და ახალაიას დაკავების ფაქტს არ ადასტურებენ.
„არ ვადასტურებთ. მსგავსი ინფორმაცია არ გვაქვს", - განუცხადეს „რეზონანსს" პარტიაში.
