უნდა შევქმნათ კანონი, რომელიც უზენაესი სასამართლოს მოსამართლეების დასანიშნად სამართლიან და გამჭვირვალე გარემოს შექმნის, – ამის შესახებ პარლამენტის პირველმა ვიცე-სპიკერმა, თამარ ჩუგოშვილმა „ქართული ოცნების“ პოლიტსაბჭოს დღევანდელ განცხადებასთან დაკავშირებით აღნიშნა.
„გადაწყვეტილება, რაც საქართველოს პარლამენტმა მიიღო, როდესაც არ დაამტკიცა, თანაც ნაჩქარევად, პარლამენტისთვის სრულიად უპასუხისმგებლოდ შემოთავაზებული სია, სწორი იყო. მე ამ აზრზე ვრჩები. ურთულესი პროცესი გვაქვს გასავლელი და შესაქმნელია კანონი, რომელიც უზენაესი სასამართლოს მოსამართლეების დასანიშნად სამართლიან და გამჭვირვალე გარემოს შექმნის. ძალიან დიდი პასუხისმგებლობით ვეკიდები ამას. იმედი მაქვს, შევძლებთ, სამუშაო რეჟიმს დავუბრუნდეთ და ამ რეჟიმში დავიწყოთ კანონპროექტზე მუშაობა, მივიღოთ ისეთი პროდუქტი, რომელიც მოგვცემს შანსს, რომ უზენაესი სასამართლო დავაკომპლექტოთ საუკეთესო მოსამართლეებით.
არ ვიზიარებ შეფასებას, რომ ყველა, ვინც კრიტიკულად არის განწყობილი ამ პროცესების მიმართ, მართულია ერთი პოლიტიკური ძალისგან. ძალიან ბევრ ადამიანს აქვს კრიტიკული მოსაზრება და ამ კრიტიკას აქვს თავისი საფუძვლები. ვიზიარებ იმ ნაწილს, სადაც საუბარია, რომ დისკუსია სამუშაო რეჟიმში განხორციელდეს, რადგან ქვეყანას ძალიან აზიანებს ასეთი რყევები. თუ შევძლებთ, სამუშაო რეჟიმში დაბრუნებას, ეს საუკეთესო გამოსავალი იქნებოდა. მინდა, მჯეროდეს, რომ აქამდე მივალთ, მაგრამ წინ გველის რთული პროცესები“, – განაცხადა თამარ ჩუგოშვილმა.
