გადაწყვეტილება მიღებულია, რომ მოსამართლეთა მიერ წარდგენილ სიას კენჭი არ ეყრება. შევთანხმდით, რომ ჯერ პროცედურები და კრიტერიუმები უნდა შემუშავდეს, – ამის შესახებ საქართველოს პარლამენტის თავმჯდომარე ირაკლი კობახიძემ ჟურნალისტების კითხვის საპასუხოდ განაცხადა, თუ როგორ მოხდება იუსტიციის უმაღლესი საბჭოს მიერ პარლამენტისთვის წარდგენილი უზენაესი სასამართლოს მოსამართლეთაკანდიდატების სიის გაწვევა.

როგორც  კობახიძემ აღნიშნა, ეს ტექნიკური მხარეა და შესაძლოა, ცვლილება კანონის გარდამავალ დებულებაში განხორციელდეს.

„ზოგადად, გადაწყვეტილია, რომ ამ სიას კენჭი არ ეყრება და კენჭი ეყრება ახალ სიას, რომელიც წარმოდგენილი იქნება. თუ იურიდიული კუთხით დასაზუსტებელი გახდა, რომ ამ 10 კანდიდატს არ ეყრება კენჭი, აღნიშნულთან დაკავშირებით შეიძლება კანონის გარდამავალ დებულებებში ცვლილება შევიტანოთ. ეს წმინდა ტექნიკური მხარეა. შევთანხმდით, რომ ჯერ შემუშავდება პროცედურა, კრიტერიუმები. ამ ფილტრს გაივლის ყველა კანდიდატი. მათში შესაძლოა ის 10 კანდიდატიც შედიოდეს, რომელიც მანამდე იყო წარმოდგენილი. ასევე სხვა კანდიდატები“, – განაცხადა ირაკლი კობახიძემ.

როგორც პარლამენტის თავმჯდომარე აანონსებს, პროცესი მაქსიმალურად ღიად და გამჭვირვალედ წარიმართება.

„პროცესი იქნება მაქსიმალურად გახსნილი, ღია, გამჭვირვალე. ამის საფუძველზე შეირჩევა 18 კანდიდატი 18 ვაკანტურ პოზიციაზე, ხოლო შემდეგ პარლამენტი მიიღებს გადაწყვეტილებას, ვის დაუჭერს მხარს. ჩემი მხრიდან დღეს არასწორი იქნება ვინმეს მხარდაჭერაზე ან მხარდაჭერის უარზე საუბარი“, – განაცხადა ირაკლი კობახიძემ.