საზოგადოებრივ მაუწყებელთან აქცია მიმდინარეობს. საზოგადოებრივ მაუწყებელთან შეკრებილია საზოგადოების ის ნაწილი, რომელიც „გაერო-ს მიგრანტთა პაქტიდან” საქართველოს გამოსვლას ითხოვს.
აქციის ერთ-ერთი ორგანიზატორის ჯონდი ბაღათურიას თქმით, საზოგადოებრივ მაუწყებელთან მათი შეკრების მიზანია, რომ მოხდეს საზოგადოების ყველა ნაწილის მოთხოვნების გაშუქება, როგორც კონსერვატიულის, ისე – ლიბერალურის.
„ჩვენ ვითხოვთ, რომ მიგრანტთა პაქტის არსებობა გაშუქდეს. გაშუქდეს საზოგადოების იმ ნაწილის აქტივობა, ვინც ამ პაქტს არ ვეთანხმებით. არ ვეთანხმებით აზიის და აფრიკის ღარიბი ქვეყნებიდან მიგრანტების შეუზღუდავად გადმოსახლებას”, – განაცხადა ჯონდი ბაღათურიამ.
მისივე თქმით, “საზოგადოებრივი მაუწყებლის” ხელმძღვანელობა კონსტრუქციულად დახვდა აქციის მონაწილეებს და ცოტა ხანში დაიწყება დიალოგი „საზოგადოებრივი მაუწყებლის” ხელმძღვანელობასთან.
