საქართველოს სასჯელაღსრულებისა და პრობაციის მინისტრი გიორგი მღებრიშვილი აშშ-ის სახელმწიფო დეპარტამენტის ნარკოტიკებისა და სამართალდამცავ ორგანოებთან თანამშრომლობის საერთაშორისო ბიუროს ევროპისა და აზიის ოფისის დირექტორს, ლეს ვიგერს და ამერიკის შეერთებული შტატების ელჩის მოადგილეს ნიკოლას ბერლინერს შეხვდა.
შეხვედრაზე საქართველოში თანამედროვე და ჰუმანური სასჯელაღსრულების პრაქტიკის განვითარებაზე, მულტიდისციპლინარული გუნდის ფორმირების ხელშეწყობაზე, პენიტენციური სისტემის თანამშრომელთა შესაბამის მომზადებასა და აღნიშნული მიმართულებით აშშ-ის მხარდაჭერის როლზე ისაუბრეს.
ლეს ვიგერმა სამინისტროს მიერ გატარებული რეფორმები დადებითად შეაფასა . მან მინისტრს საქართველოს სასჯელაღსრულებისა და პრობაციის სამინისტროს თანამშრომლების მიერ კოლორადოს სასჯელაღსრულების საერთაშორისო სასწავლო ცენტრში რისკების მართვის პროგრამის წარმატებით დასრულება მიულოცა. აღსანიშნავია, რომ უახლოეს მომავალში პენიტენციური სისტემის თანამშრომლები ამერიკის შეერთებულ შტატებში ინტენსიური სწავლების კიდევ ერთ კურს გაივლიან.
გიორგი მღებრიშვილმა ბატონ ლეს ვიგერს თანამშრომლობისთვის მადლობა გადაუხადა. „სასჯელაღსრულების სისტემაში მიმდინარე რეფორმის ერთ-ერთი მთავარი შემადგენელი ნაწილი თანამშრომელთა კვალიფიკაციის ამაღლება და გადამზადებაა. სწორედ ამიტომ ამერიკის შეერთებული შტატების დახმარება კადრების მომზადების კუთხით დროული და მნიშვნელოვანი ნაბიჯია. სისტემის თანამშრომლეთა პირველმა ჯგუფმა ამერიკის შეერთებულ შტატებში სასწავლო პროგრამა წარმატებით გაიარა და ახლა უკვე ისინი საკუთარ გამოცდილებას სხვა თანამშრომლებს უზიარებენ. “-აღნიშნა გიორგი მღებრიშვილმა.
ლეს ვიგერმა ყურადღება წარმატებული ურთიერთთანამშრომლობის მნიშვნელობაზე გაამახვილა: „მოხარული ვარ, რომ ვარ საქართველოში, მქონდა ძალიან პროდუქტიული შეხვედრა სასჯელაღსრულებისა და პრობაციის მინისტრთან. საქართველოს სასჯელაღსულებისა და პრობაციის სამინისტრო, აშშ-ს საელჩო და ამერიკის სახელმწიფო დეპარტამენტი მნიშვნელოვანი პარტნიორები არიან. ჩვენ ვეხმარებით სამინისტროს რეფორმის განხორციელების პროცესში, ეს დახმარება ითვალისწინებს სისტემის თანამშრომლების სასწავლო ვიზიტებს ამერიკის შეერთებულ შტატებში. აგრეთვე, ჩვენი წარმოამდგენლები ჩამოდიან საქართველოში, რათა გავუზიაროთ გამოცდილება სასჯელაღსულების სფეროს თანამშრომლებს. სასჯელაღსრულებისა და პრობაციის სამინისტრო ახორციელებს მნიშვნელოვან რეფორმებს, რომელიც ეხება სასჯელაღსრულების დაწესებულებების კატეგორიებად დაყოფას, ასევე, მსჯავრდებულებისთვის რეაბილიტაციის პროგრამებს, რათა ციხიდან გამოსვლის შემდეგ მათ სრულფასოვანი რესოციალიზაცია შეძლონ“.
ამერიკის შეერთებული შტატების მთავრობამ საქართველოს სასჯელაღსრულების სისტემას 1 მილიონი დოლარი გამოუყო, რომლის ფარგლებში საქართველოს პენიტენციურ სისტემაში თანამედროვე სტანდარტების განვითარების მიზნით სისტემის თანამშრომელთა გადამზადება ხორციელდება.
