სოფლის მეურნეობის მინისტრის მოადგილე დავით გალეგაშვილი და სასოფლო-სამეურნეო კოოპერატივების განვითარების სააგენტოს თავმჯდომარე გიორგი მიშელაძე წალკის რაიონის სოფელ ავრანლოში, სასოფლო-სამეურნეო კოოპერატივების წარმომადგენლებს შეხვდნენ. შეხვედრას ადგილობრივი მუნიციპალიტეტისა და საერთაშორისო ორგანიზაციების წარმომადგენლები ესწრებოდნენ.

მინისტრის მოადგილემ და სააგენტოს თავმჯდომარემ,  კოოპერატივების მხარდაჭერის მიზნით დაგეგმილ    სახელმწიფო პროგრამებზე ისაუბრეს და ფერმერების შეკითხვებს უპასუხეს.  წალკა  პირველი  მუნიციპალიტეტია,  სადაც მეორე დონის სასოფლო-სამეურნეო კოოპერატივი შეიქმნა. დავით გალეგაშვილმა კოოპერატივების გამსხვილება დადებითად შეაფასა.

“წალკის მაგალითი ადასტურებს, რომ კოოპერაციის პროცესი წარმატებით მიმდინარეობს. ახლადშექმნილმა კოოპერატივებმა  უკვე სამ თვეში  საკუთარი შემოსავლები და  პროდუქციის რეალიზაცია გაზარდეს, რამაც  გლეხების ეკონომიკური მდგომარეობის გაუმჯობესება და კონკურენტული გარემოს ჩამოყალიბება განაპირობა“, - განაცხადა დავით გალეგაშვილმა.

სასოფლო-სამეურნეო კოოპერატივების განვითარების სააგენტოს თავმჯდომარის გიორგი მიშელაძის განცხადებით, კანონმდებლობით გათვალისწინებული საგადსახადო შეღავათებისა და სახელმწიფო პროგრამების გარდა, სასოფლო-სამეურნეო კოოპერატივებისთვის  მენეჯმენტსა და ფინანსური მართვის საკითხებში  კვალიფიკაციის ასამაღლებელი კურსები  ჩატარდება.

დავით გალეგაშვილმა და გიორგი მიშელაძემ ახლადშექმნილი მეორე დონის კოოპერატივის  ,,თეზი“  საქმიანობას ადგილზე გაეცნენ და რძის გადამამუშავებელი საწარმო დაათვალიერეს. სასოფლო-სამეურნეო კოოპერატივი „თეზი“ ოთხი კოოპერატივის - „ქცია 2014“, “ხანდო 2014“, ,,კორსუ 2014“, “გუმბათი 2014“  - გაერთიანების  შედეგად შეიქმნა და  43  წევრს აერთიანებს. მისი ძირითადი საქმიანობა მერძევეობაა. გაერთიანების შემდეგ რძის წარმოება დღეში   5 ტონამდე გაიზრდა. აღნიშნული რძით კოოპერატივი რძის პროდუქტების მწარმოებელ საწარმო “ნატურალ პლიუსს“  ამარაგებს.  კონკურენციის შედეგად, რძის რეალიზაციის ფასმა 30-60  თეთრიდან  90 თეთრამდე მოიმატა და ადგილობრივი გლეხების შემოსავალი 200-300 ლარით გაიზარდა. კოოპერატივი “თეზი“  გაფართოვებასა  და გადამამუშავებელი საწარმოს შექმნას გეგმავს.