სპეცოპერაციისას დაკავებულ უკრაინის 6 და საქართველოს ერთ მოქალაქეს ბრალი ოფიციალურად წარედგინათ, თუმცა ისინი ბრალს არ აღიარებენ, – ამის შესახებ ჟურნალისტებს თბილისის პოლიციის მთავარი სამმართველოს შენობის დატოვების შემდეგ დაკავებულ პირთა ადვოკატებმა განუცხადეს.
ადვოკატ გიორგი როსტომაშვილის ინფორმაციით, ბრალდებულებმა პროტესტის ნიშნად, ბრალის წარდგენის ოფიციალურ ფურცელს “სლავა უკრაინა” დააწერეს და დოკუმენტს ხელი არ მოაწერეს. გიორგი როსტომაშვილის განცხადებით, აღნიშნულ პირებს უცნობი ადამიანები უთვალთვალებდნენ, რომლებიც სავარაუდოდ სამართალდამცავ უწყებას წარმოადგენდნენ.
პოლიციის შენობასთან იმყოფებოდნენ დაკავებულო საქართველოს მოქალაქის ლუკა ჩხეტიას ოჯახის წევრებიც, რომლებიც დაკავების მიზეზზე ვერ საუბრობენ.
შინაგან საქმეთა სამინისტრომ თბილისში, ლიხაურის ქუჩაზე მდებარე სასტუმრო „გურუსა“ და „ალიანსში“ სპეცოპერაცია ჩაატარა. შსს-ს მიერ გავრცელებული ინფორმაციით, დაკავებულები არიან უკრაინის მოქალაქეები: ო.ნ., რ.მ., დ.კ. ი.კ., ი.ო., ს.კ. და საქართველოს მოქალაქე ლ.ჩ.
მათივე ინფორმაციით, სასტუმროს ნომრების ჩხრეკისას ამოღებულია „ბერეტას“ და „მაკაროვის“ სისტემის ცეცხლსასროლი პისტოლეტი, ავტომატური ხელნაკეთი ცეცხლსასროლი იარაღი და სხვადასხვა სახის საბრძოლო მასალა.
