ვერის ბაღში გამართულ აქციაზე იმყოფება ფოტოგრაფი გიორგი აბდალაძე. მისი თქმით, ყველაფერს გააკეთებს, იმისთვის, რომ ,,ნაციონალური მოძრაობა“ არ დაბრუნდეს ქვეყნის სათავეში. 

ფოტოგრაფი საზოგადოებას არჩევნებზე მისვლისკენ მოუწოდებს.

,,მოთხოვნები ყველას აქვს ერთი, რომ ,,ნაციონალურ მოძრაობას“ და მიხეილ სააკაშვილს ეთქვას უარი, ამ ქვეყანაში. ჩვენ ყველაფერი უნდა გავაკეთოთ, რომ ყველა წავიდეს არჩევნებზე და უარი უთხრას მიხეილ სააკაშვილს“, - განაცხადა გიორგი აბდალაძემ. 
ფოტოგრაფი ამბობს, რომ პრეზიდენტობის კანდიდატი გრიგოლ ვაშაძე ბუტაფორიაა, რომელსაც საქართველოს ყოფილი პრეზიდენტი საკუთარი მიზნის განსახორციელებლად იყენებს. 

,,ვაშაძე ბუტაფორიაა. ძირითადად სააკაშვილს უნდა ძალაუფლების ხელში აღება. ვაშაძე არის სატყუარა, რომელმაც მთავარი ფუნქცია უნდა შეასრულოს,  რომ შეიწყალოს ეს ბანდა. ისევ შეკრიბოს და დაიწყონ მერე მოქმედება. ჩვენ არ უნდა მივცეთ ამის საშუალება“, - აცხადებს ფოტოგრაფი. 

მისი თქმით, საზოგადოებამ ,,ქართულ ოცნებას“ კიდევ ერთი შანსი უნდა მისცეს და ,,ნაციონალური მოძრაობის“ დაბრუნება არ დაუშვას. 

,,თუ ვინმე განაწყენებულია ,,ოცნებაზე“, წინ არის საპარლამენტო არჩევნები, წელიწად ნახევარში. შეწყალების უფლება არ უნდა მივცეთ ამ ჯალათებს, ეს არის ყველაზე მთავარი და მნიშვნელოვანი, რასაც ვითხოვთ თითოეული“, - განაცხადა აბდალაძემ.
ვერის ბაღში აქცია ამ წუთებში მიმდინარეობს.