აშშ-ს სახელმწიფო მდივანმა რექს ტილერსონმა ერაყის პრემიერ-მინისტრთან ხაიდერ ალ-აბადისთან სატელეფონო საუბარში განაცხადა, რომ აშშ უსაფრთხოების გაძლიერების კუთხით ერაყის მხარდაჭერას განაგრძობს. ამის შესახებ ინფორმაციას ერაყის პრემიერ-მინისტრის პრესსამსახური ავრცელებს.
რექს ტილერსონმა ერაყის პრემიერ-მინისტრს განუცხადა, რომ „აშშ განაგრძობს ერაყის მხარდაჭერას სტაბილურობის აღდგენის, ინვესტიციების მოზიდვის, რეკონსტრუქციისა და მშენებლობის კუთხით, ასევე ეკონომიკური რეფორმების გატარებაში“.
აშშ-ს სახელმწიფო მდივანმა ასევე აღნიშნა, რომ ვაშინგტონი დარწმუნებულია, რომ ბაღდადი ერაყში ტერორიზმს სრულად აღმოფხვრის.
გასული წლის დეკემბერში ერაყის პრემიერ-მინისტრმა „ისლამურ სახელმწიფოზე“ გამარჯვება გამოაცხადა. მასშტაბური სპეცოპერაციის შედეგად გათავისუფლდა ქალაქი მოსული და სხვა ქალაქები, რომლებსაც „ისლამური სახელმწიფოს“ ტერორისტები იკავებდნენ.
