ხელვაჩაურში თვითდაზიანების შედეგად დაშავებული 17 წლის მოზარდის მეგობარი სპარტაკ კახიძე ადასტურებს, რომ მისი მეგობარი „ლურჯ ვეშაპს“ თამაშობდა.
როგორც მან ჟურნალისტებს განუცხადა, მის მეგობარს პერიოდულად ხელზე დანით დაზიანებები ჰქონდა მიყენებული. სპარტაკ კახიძის თქმით, დაშავებული ნაკლებად კომუნიკაბელური იყო.
"მასთან ვმეგობრობდი. ურთიერთობაში გახსნილი და მოლაპარაკე არ ყოფილა. ის „ლურჯ ვეშაპს“ თამაშობდა. თქვითონ ამბობდა, ვთამაშობდი, მაგრამ ახლა აღარ ვთამაშობო. ხელზე დანით მიყენებული ნაკაწრები ჰქონდა, რაც სკოლის მოსწავლეებმა, დირექტორმაც შეამჩნია",- განაცხადა დაშავებულის მეგობარმა.
როგორც ცნობილია, ხელვაჩაურში 17 წლის მოზარდმა, სავარაუდოდ, სანადირო თოფით თვითდაზიანება ორი დღის წინ, სახის არეში მიიყენა. ის კრიტიკულ მდგომარეობაშია.
