საქართველოს არჩევნების ისტორიაში მეორე ტურისთვის ბრძოლა არის ხელისუფლების გამარჯვებისთვის ბრძოლა, - ამის შესახებ ”ახალი საქართველოს” ლიდერმა გიორგი ვაშაძემ დღეს გამართულ პრესკონფერენციაზე განაცხადა.
ვაშაძის თქმით, მის შეთავაზებაზე ოპოზიციის გაერთიანებასთან და ფართო ოპოზიციური პრაიმერის ჩატარებასთან დაკავშირებით ოპოზიციისგან სამი კატეგორიის პასუხი მიიღეს, მათ შორის ერთ-ერთია მეორე ტურისთვის ბრძოლა და მეორე ტურში გაერთიანება.
”გუშინ ჩვენს შეთავაზებაზე მოვისმინეთ სამი კატეგორიის პასუხი. პირველი, რომ თითქოს ეს თამაში უკვე უთამაშიათ, ეს არის ტყუილი, საქართველოში ფართო ოპოზიციური პრაიმერი არასდროს ჩატარებულა; მეორე, თითქოს ეს არასერიოზული შეთავაზებაა, პირდაპირ ვამბობ, რომ არასერიოზულია ზედმეტი ამბიციების ქონა და უაზრო ამბიციებზე აყოლა. მესამე და მთავარი საკითხი, რომ მეორე ტურისთვის ბრძოლა არის მნიშვნელოვანი და მეორე ტურში ოპოზიციის გაერთიანება. საქართველოს არჩევნების ისტორიაში არც ერთხელ მეორე ტურში ოპოზიციას არ გაუმარჯვია, საქართველოს არჩევნების ისტორიაში 100-ვე პროცენტის შემთხვევაში, მეორე ტურში ოპოზიცია აუარესებს შედეგს, საქართველოს არჩევნების ისტორიაში მეორე ტურისთვის ბრძოლა არის ხელისუფლების გამარჯვებისთვის ბრძოლა. ამიტომ კიდევ ერთხელ მივმართავ თითოეულ ოპოზიციურ პარტიას, ვისაც მართლა სურს "ქართული ოცნების" დამარცხება, დავივიწყოთ ზედმეტი ამბიციები, გავერთიანდეთ და დავამარცხოთ "ქართული ოცნება". მოვიდეთ ხელისუფლებაში და დავაყენოთ ქვეყანა ფეხზე”, - განაცხადა ვაშაძემ.
როგორც პოლიტიკური გაერთიანება ”სამოქალაქო ალიანსი თავისუფლებისთვის” ლიდერმა ზურაბ ხარატიშვილმა აღნიშნა, მეორე ტურში არც ერთ ოპოზიციურ კანდიდატს არ გაუუმჯობესებია ის შედეგი, რომელიც მან პირველ ტურში მოიპოვა.
”2014 წლის ადგილობრივი თვითმმართველობის არჩევნებში 63 თვითმმართველი ერთეულიდან მეორე ტურის გამართვა 21 მათგანში გახდა საჭირო, ამ 21-დან მეორე ტურში ოცდაერთივეში ხელისუფლების წარმომადგენელმა გაიმარჯვა. 2016 წლის მაჟორიტარული არჩევნების დროს, 73-დან 50 მაჟორიტარულ ოლქში გახდა მეორე ტურის გამართვა საჭირო, აქედან ორმოცდაათშივე ხელისუფლებამ გაიმარჯვა. ერთი იყო პირობითად დამოუკიდებელი კანდიდატი სალომე ზურაბიშვილი, პრაქტიკულად აქაც 100%-იანი შედეგი იყო. ზუგდიდში ოპოზიციის კანდიდატმა, რომელმაც პირველივე ტურში გაიმარჯვა, აღარ მიიღო მეორე ტურში მონაწილეობა, რადგან ამას რეალურად აზრი აღარ ჰქონდა, იმდენად დიდი იყო მეორე ტურში ხელისუფლების მობილიზება. მეორე ტურში არც ერთ ოპოზიციურ კანდიდატს არ გაუუმჯობესებია ის შედეგი, რომელიც პირველ ტურში მოიპოვა, ხოლო ხელისუფლების კანდიდატმა მკვეთრი გაუმჯობესება აჩვენა. ქართული არჩევნები დიდი ხანია გადაიქცა რესურსების არჩევნებად და ოპოზიციას არასოდეს ყოფნის ძალა და რესურსი, რომ იბრძოლოს მეორე ტურში”, - განაცხადა ხარატიშვილმა.
გიორგი ვაშაძის ინფორმაციით, ორშაბათს, 7 აგვისტოს ცენტრალურ საარჩევნო კომისიას მიმართავენ იმისთვის, რომ პრაიმერისთვის გამოყოს ყველა ტექნიკური შესაძლებლობა.
”ჩვენ ორშაბათს მივმართავთ ცენტრალურ საარჩევნო კომისიას იმისთვის, რომ პრაიმერისთვის გამოყოს ყველა ტექნიკური შესაძლებლობა, ეს მათი ვალდებულებაა. ცესკო-მ ტექნიკურად უნდა უზრუნველყოს, არასამთავრობო ორგანიზაციებმა კომისიები დააკომპლექტონ, საერთაშორისო დამკვირვებლები ჩამოვიდნენ, რათა იყოს მაღალხარისხიანი, მაღალკვალიფიციური პრაიმერი”, - განაცხადა გიორგი ვაშაძემ.
