აშშ-ის ვიცე-პრეზიდენტს შევთავაზე და შევთანხმდით შემდეგ ფორმულაზე: თუკი მათი მხრიდან არის USA - first, Georgia next ჩვენი მხრიდან იქნება, Georgia first – USA next – ჩვენ ამაზე შევჯერდით.

ამის შესახებ ჟურნალისტებს “შენების მოძრაობის” ლიდერმა დავით უსუფაშვილმა ოპოზიციისა და აშშ-ის ვიცე-პრეზიდენტის მაიკ პენსის შეხვედის შემდეგ განუცხადა.

უსუფაშვილის ინფორმაციით, მაიკ პენსთან შეხვედრისას ყურადღება საქართველოსა და აშშ-ს შორის მჭიდრო თანამშრომლობის გაგრძელებაზე გამახვილდა.

მისი თქმით, აქცენტი გაკეთდა ეკონომიკურ გაძლიერებაზე, რის გარეშეც საქართველო ვერ შესძლებს იმ როლის შესრულებას, რასაც საქართველოში თავად აშშ ხედავს.

“უსაფრთხოების თემაზე საუბრისას აღინიშნა, რომ ძალიან კარგი არჩევანია ესტონეთი-საქართველო-მონტენეგრო. ეს არის გზავნილი ჩვენი მეგობრებისთვის ევროპაში, რომ აღმოსავლეთ ევროპის ქვეყნებს მეტი როლი ენიჭება მსოფლიო უსაფრთხოების და სხვა საკითხების უზრუნველყოფაში. ეს არის მკაფიო გზავნილი მტრებისთვის, რომ საქართველო არ არის მარტო და არ იქნება მარტო”, - განუცხადა ჟურნალისტებს დავით უსუფაშვილმა.