თუ ბიძინა ივანიშვილი ჩაერთვება საარჩევნო კამპანიაში, ბუნებრივია, პოზიტივის მეტს არაფერს მოუტანს პარტიასა და მმართველ გუნდს, - ამის შესახებ ჟურნალისტებს „ქართული ოცნების“ პოლიტსაბჭოს სხდომის დასრულების შემდეგ ფრაქცია „ქართული ოცნების“ თავმჯდომარემ მამუკა მდინარაძემ განუცხადა.
მისივე თქმით, ასევე უცნობია დაესწრება თუ არა ყოფილი პრემიერ-მინისტრი მმართველი პარტიის თბილისის მერობის კანდიდატის ოფიციალურ წარდგენას, თუმცა აღნიშნავს, რომ ბუნებრივია, ის მოწვეულ სტუმრებს შორის უნდა იყოს.
”ბატონი ბიძინა ბუნებრივია, მოწვეული უნდა იყოს, თუმცა არ მაქვს ინფორმაცია დაესწრება თუ არა მერობის კანდიდატის წარდგენას. არ ვიცი ის ჩაერთვება თუ არა საარჩევნო კამპანიაში, მაგრამ თუ ბიძინა ივანიშვილი ჩაერთვება საარჩევნო კამპანიაში, ბუნებრივია, პოზიტივის მეტს არაფერს მოუტანს პარტიას და მმართველ გუნდს”, - აღნიშნა მამუკა მდინარაძემ.
მან „ქართული ოცნების“ თბილისის მერობის კანდიდატის კახა კალაძის შესახებ ისაუბრა და აღნიშნა, რომ კალაძე უალტერნატივო კანდიდატია. მდინარაძის განცხადებით, კალაძე ისეთივე წარმატებული მერი იქნება, როგორიც ის იყო სხვადასხვა თანამდებობებზე მუშაობისას.
”კახა კალაძის კანდიდატურა უალტერნატიოა. ის იყო წარმატებული სპორტსმენი, წარმატებული იყო ენერგეტიკაში და ყველა იმ სფეროში, სადაც იყო. მჯერა, ის ისეთივე წარმატებული იქნება თბილისის მერის თანამდებობაზე და თბილისი იქნება ახალი ბრენდი”, - განაცხადა მამუკა მდინარაძემ.
ჯერჯერობით უცნობია ვინ უხელმძღვანელებს მმართველი პარტიის საარჩევნო შტაბს. ასევე საბჭოს წევრები არ აკონკრეტებენ თუ ვინ შეცვლის კახა კალაძეს ენერგეტიკის მინისტრის პოსტზე და სად გააგრძელებს მუშაობას თბილისის მოქმედი მერი დავით ნარმანია არჩევნების შემდეგ.
