საქართველო უკვე მოიხსენიება იმ საუკეთესო ქვეყნებს შორის, რომელსაც აქვს საპარლამენტო კონტროლი სტრასბურგის სასამართლოს გადაწყვეტილებებზე, - ამის შესახებ პარლამენტის იურიდიულ საკითხთა კომიტეტის თავმჯდომარე ეკა ბესელიამ ჟურნალისტებს, ხელისუფლების მიერ ადამიანის უფლებათა ევროპული სასამართლოს გადაწყვეტილებების აღსრულებაზე ეფექტური საპარლამენტო კონტროლის თაობაზე სამუშაო შეხვედრის დაწყებამდე განუცხადა.
როგორც ბესელიამ აღნიშნა, პარლამენტმა 2016 წელს მიიღო საკანონმდებლო ცვლილებები, რითაც სტრასბურგის სასამართლოს გადაწყვეტილებების აღსრულებაზე საპარლამენტო კონტროლის მექანიზმი დაინერგა.
"საქართველო აღმოსავლეთ პარტნიორობის წევრ ქვეყნებს შორის პირველი ქვეყანაა, რომელმაც საუკეთესო პრაქტიკა დანერგა. გასულ წელს მიღებული ცვლილებებით არსებობს უკვე საპარლამენტო კონტროლი, თუ როგორ სრულდება სტრასბურგის სასამართლოს გადაწყვეტილებები საქართველოში. ევროსაბჭოს საპარლამენტო ასამბლეამ ახლახანს დაამტკიცა ერთ-ერთი დეპუტატის ანგარიში, სადაც საქართველო ნაჩვენებია როგორც კარგი სტანდარტის მქონე ქვეყანა, რომელიც ასრულებს სასამართლოს გადაწყვეტილებებს. ჩვენ გვაქვს უკვე 55 გადაწყვეტილება აღსრულებული და მხოლოდ 35 გადაწყვეტილებაა აღსრულების პროცესში. ეს კარგი მაჩვენებელია. საქართველო უკვე მოიხსენიება იმ საუკეთესო ქვეყნებს შორის, რომელსაც აქვს საპარლამენტო კონტროლი სტრასბურგის სასამართლოს გადაწყვეტილებებზე და ახლა ვამკვიდრებთ ამ საუკეთესო პრაქტიკას. დღევანდელი კონფერენციაც ამ საკითხის გაგრძელებაა, რომ იყოს უფრო კარგად გააზრებული რამდენად დიდი მნიშვნელობა აქვს ამ სტანდარტს", - განაცხადა ეკა ბესელიამ.
დეპუტატის თქმით, საპარლამენტო ასამბლეის ანგარიშში დასახელდა 10 ქვეყანა, რომელიც არ ასრულებს სტრასბურგის გადაწყვეტილებებს და ამ 10 ქვეყანას შორის საქართველო არ არის.
