ელენე ხოშტარიას და ალეკო ელისაშვილს აქვთ ყველაზე დიდი შანსი, თბილისის მერის არჩევნებზე მიიღონ პარტიებისგან დამოუკიდებელი ხმები - ამის შესახებ ქალაქ თბილისის ყოფილმა მერმა და ”ევროპული საქართველოს” ერთ-ერთმა ლიდერმა გიგი უგულავამ ”პალიტრანიუსის” გადაცემაში ”360 გრადუსი” სტუმრობისას ადგილობრივი თვითმმართველობის არჩევნებზე საუბრისას განაცხადა.
როგორც გიგი უგულავამ განმარტა, სხვა წარმოდგენილ არც ერთ სავარაუდო კანდიდატს არ გააჩნია ინდივიდუალიზმი, შესაბამისად, წარმოდგენილი კანდიდატები პარტიული ხმების გარდა ვერ მიიღებენ სხვა მხარდამჭერთა ხმებს.
”სხვა პარტიებმა თუნდაც ჯოხი ჩაარჭონ, მაინც იმდენ ხმას მიიღებენ, რამდენსაც ის პარტიები, ვინც ამ კანდიდატებს წარმოადგენენ. მე ამით არავის მინდა შეურაცხყოფა მივაყენო, უბრალოდ სხვა კანდიდატებს არ აქვთ ინდივიდუალიზმი და ზრდის პერსპექტივა.
ყველაზე დიდი შანსი ელენე ხოშტარიას და ალეკო ელისაშვილს აქვთ, პარტიისგან დამოუკიდებელი ხმები მიიღონ. არც ერთ კანდიდატს არ აქვს ინდივიდუალიზმი. განსხვავებით ჩვენი კანდიდატისგან, რომელსაც გარდა პარტიული მხარდაჭერისა, შეუძლია მოიზიდოს ის ადამიანები, რომლებმაც შეიძლება ”ევროპულ საქართველოს” არ მისცენ ხმა, მაგრამ მისცენ ელენე ხოშტარიას”, - განაცხადა გიგი უგულავამ.
უგულავამ თბილისის მერობის სხვა კანდიდატების შანსებიც შეაფასა და აღნიშნა, რომ ელენე ხოშტარიას კონკურენტი ”ქართული ოცნების” მერობის კანდიდატი იქნება. რაც შეეხება ყოფილი ჟურნალისტის, ზაალ უდუმაშვილს, გიგი უგულავას თქმით, მას წინასაარჩევნო კამპანიის ტემპერამენტი აკლია.
