ლონდონში ათეულობით დემონსტრანტი, რომელიც „გრენფელ თაუერის“ ხანძრის გამო ხელისუფლების წინააღმდეგ პროტესტს გამოხატავს, ლონდონის კენსინგტონის რაიონის საბჭოს შენობაში შეიჭრა. ამის შესახებ „სქაი ნიუსი“ იუწყება.
მომიტინგეებს შენობაში შესვლისას ეკავათ პლაკატები, წარწერით: „მოვითხოვთ სამართლიანობას“. შენობაში დემონსტრანტებსა და სამართალდამცველებს შორის შეხლა-შემოხლა მოხდა. საბოლოოდ, მათ შენობა დაატოვებინეს.
„ბი-ბი-სის“ ინფორმაციით, აქციის მონაწილეებმა საკუთარი მოთხოვნები გააჟღერეს, რომელთაგან ერთ-ერთია ტრაგედიის შედეგად გარდაცვლილთა სიის გამოქვეყნება, დაზარალებულების იმავე რაიონში განსახლება, დაკარგული ქონების ანაზღაურება და ამავე რაიონში არსებულ შენობებში შემოწმებების ჩატარება.
ლონდონის Grenfell Tower-ის მაღალსართულიან კორპუსში გაჩენილი ხანძრის შედეგად, ბოლო ინფორმაციით, დაღუპულად მიიჩნევა 30 ადამიანი, 65 უგზო-უკვლოდ დაკარგულია. 24 ადამიანი საავადმყოფოში რჩება, რომელთაგან 12-ის მდგომარეობა კრიტიკულია.