ლევან ალაფიშვილის ინფორმაციით, ხელისუფლება არსებული საარჩევნო სისტემის შენარჩუნებისთვის ემზადება. როგორც ალაფიშვილი აცხადებს, აღმოსავლეთ პარტნიორობის ეროვნული პლატფორმის წარმომადგენლებთან შეხვედრისას, პარლამენტის თავმჯდომარემ განაცხადა, რომ თუკი ვენეციის კომისია პარლამენტის არჩევნების ”ბონუსურ” სისტემაზე უარყოფით დასკვნას დადებს, ხელისუფლება არსებულ საარჩევნო სისტემას აღარ შევცვლის და მას შეინარჩუნებს.
"საკონსტიტუციო ცვლილებებზე გამართული ბერლინის კონფერენციის შემდეგ ვრცელდება ინფორმაცია, რომ ვენეციის კომისიას უარყოფითი შეფასება აქვს პარლამენტის არჩევნების ე.წ. ბონუსურ სისტემაზე. ამ კონტექსტში საინტერესოა ის, რომ 25 აპრილს, აღმოსავლეთ პარტნიორობის პლატფორმის წევრ ორგანიზაციებთან შეხვედრისას, პარლამენტის თავმჯდომარემ განაცხადა, რომ თუკი ვენეციის კომისიაც უარყოფით დასკვნას დადებს ”ბონუსურ” სისტემაზე, მაშინ უმრავლესობა შეცვლის ამ გადაწყვეტილებას და საარჩევნო სისტემას საერთოდ არ შეეხება - შეინარჩუნებს დღეს მოქმედ შერეულ მოდელს. ამით მმართველი პოლიტიკური ძალა დაიბრუნებს საკუთარი მაჟორიტარების მხარდაჭერას და მყარ კონსტიტუციურ უმრავლესობას. ამასთან იტყვის: "ჩვენ სისტემას ვაუმჯობესებდით, მაჟორიტარულზე საერთოდ უარს ვამბობდით, მაგრამ რადგან პოლიტიკური თუ არასამთავრობოები ჩვენს შეთავაზებულ მოდელს მიუღებლად მიიჩნევენ და ასეთივეა განწყობა ქვეყნის გარეთაც, მათ გამო იძულებული ვართ უარი ვთქვათ საარჩევნო სისტემის გაუმჯობესებაზე". ეს არ არის სახელმწიფოებრივი მიდგომა. იმედი მაქვს, მმართველი პოლიტიკური ძალა გამოვა საკუთარი პარტიული ჩარჩოდან და პრობლემას უფრო ფართოდ შეხედავს",-განუცხადა ალაფიშვილმა "ინტერპრესნიუსს".
