იურისტი ლევან ალაფიშვილი იუსტიციის უმაღლესი საბჭოს ინიციატივას, რომ მოსამართლის შეურაცხყოფა დასჯადი გახდეს, ”სულელურს” უწოდებს.
როგორც ალაფიშვილმა ”ინტერპრესნიუსს” იუსტიციის უმაღლესი საბჭოს აღნიშნული ინიციატივისა და მედიის მიმართ გამოთქმული კრიტიკის შეფასებისას განუცხადა, „ამ სასაცილო იდეას განხორციელება რომ არ უწერია, თვითონ საბჭომაც კარად იცის“. ალაფიშვილის შეფასებით, ასეთი კანონის მიღება უკან, საბჭოთა კავშირში დაბრუნება იქნება.
”უკან, საბჭოთა კავშირში დაბრუნება შეუძლებელია. ეს ყველამ უნდა იცოდეს. ამის გაცნობიერება, როგორც ჩანს, ყველას არ შეუძლია. შეგახსენებთ, რომ საბჭოთა კავშირის პერიოდში არა მხოლოდ მოსამართლეების, არამედ ზოგადად შეურაცხყოფა სისხლის სამართლის ქმედებად იყო გამოცხადებული. შესაბამისად, ამ მუხლის გამოყენება ხდებოდა სხვადასხვა მიზნისთვის, მათ შორის, პირველ რიგში, მედიისთვის და საჯარო კრიტიკისთვის. დემოკრატია და საბჭოთა კავშირი (ტოტალიტარული რეჟიმები), თავისი რეგულაციებით, მათ შორის კრიტიკასთან, საჯაროობასთან, დებატებთან, როგორც ცეცხლი და წყალი ისეა შეუთავსებელი. ამას თუ ვინმე ვერ აცნობიერებს, ძალიან ჩამორჩენილია იმ მატარებელს, რომლითაც საქართველო შესაძლოა ცოტა პრობლემებით, მაგრამ მაინც წინ მიდის დემოკრატიულ ოჯახში დამკვიდრებისთვის. ამ სასაცილო იდეას განხორციელება რომ არ უწერია თვითონაც კარგად იციან, მით უმეტეს იმ ადამიანებმა, რომლებსაც სასამართლოსთან და მით უმეტეს ევროპულ სასამართლოსთან შეხება აქვთ ან ჰქონიათ. მათ უნდა იცოდნენ, რომ ეს იყო საბჭოთა კავშირში, თუმცა აღარ ვართ საბჭოთა კავშირში. ამ სულელურ ინიციატივას ძალიან კარგად ეხმიანება და პასუხობს ის პრეცედენტი, რომელმაც თავად მოსამართლემ შექმნა. მოსამართლე კაკაბაძემ იჩივლა ერთ-ერთი განცხადების გამო. ამ მოსამართლემ ჩათვალა, რომ კანონით დაცული მისი სიკეთე შესაძლოა იყოს უგულებელყოფილი”, - განაცხადა ალაფიშვილმა.
იუსტიციის უმაღლესი საბჭო მოსამართლის შეურაცხყოფაზე საკანონმდებლო რეგულაციის დაწესების ინიციატივით გამოდის. აღნიშნული მოსაზრება იუსტიციის უმაღლესი საბჭოს წევრებმა 4 აპრილს, იურიდიულ საკითხთა კომიტეტის სხდომაზე გააჟღერეს და დეპუტატებს ამ საკითხზე დისკუსიის დაწყება შესთავაზეს.
ამასთან, საბჭომ გუშინ გაავრცელა განცხადება და გააკრიტიკა მედიის წარმომადგენლების მიერ ბოლო პერიოდში გავრცელებული განცხადებები. საბჭოს შეფასებით, ეს განცხადებები წარმოადგენს სასამართლო სისტემის ინსტიტუტისადმი უპატივცემულობას და მოსამართლეთა ინდივიდუალური რეპუტაციის უფლების არაერთგზის უხეშ შელახვას. იუსტიციის უმაღლესი საბჭოს მოსამართლეებმა რეაგირებისთვის მიმართეს საქართველოს ჟურნალისტური ეთიკის ქარტიას, კომუნიკაციების ეროვნულ კომისიას, ჟურნალისტთა კორპუსს, სამოქალაქო სექტორს, სახალხო დამცველსა და ქართულ საზოგადოებას.
