გია ხუხაშვილი ბოლო დროს მამუკა მდინარაძის პირადი კომენტატორის ფუნქციას ითავსებს, - ასე ეხმაურება საპარლამენტო უმრავლესობის ლიდერი არჩილ თალაკვაძე მდინარაძის კომენტარისადმი ხუხაშვილის შეფასებას.
თალაკვაძე მიიჩნევს, რომ „მამუკას მიმართ ექსპერტების დაინტერესება სულ უფრო იზრდება“.
„ისეთი შთაბეჭდილება მრჩება, რომ ბოლო დროს ბატონი გია ხუხაშვილი ჩემი მეგობრის და კოლეგის, მამუკა მდინარაძის პირადი კომენტატორის ფუნქციას ითავსებს. როგორც კი ოპოზიციაზე აკეთებს შეფასებებს - ბატონი გია აუცილებლად ეხმაურება.
როგორც ჩანს, მამუკას მიმართ ექსპერტების დაინტერესება სულ უფრო იზრდება“, - განაცხადა არჩილ თალაკვაძემ.
როგორც ცნობილია, ”ევროპული საქართველო” საკონსტიტუციო ცვლილებების საკითხზე პლებისციტის ჩატარების ინიციატივით გამოდის, რასაც მმართველ გუნდში არ ეთანხმებიან. როგორც ფრაქცია ”ქართული ოცნების” თავმჯდომარე მამუკა მდინარაძემ ”ინტერპრესნიუსთან” საუბრისას განაცხადა, უმრავლესობა ვერ მიიღებს მსგავს შემოთავაზებას და ისინი არ აპირებენ ”ბორის ელცინის მიერ დამკვიდრებული გზით” სიარულს. აღნიშნული განცხადების გამო მდინარაძე დღეს პოლიტოლოგმა გია ხუხაშვილმა გააკრიტიკა და განაცხადა, რომ გაუგებარია, რა შუაშია პლებისციტთან ელცინი. „დაგვმოძღვრა პოლიტიკურმა „მძიმეწონოსანმა“ აბსურდული კომენტარებით“, - განაცხადა ხუხაშვილმა.
