პარლამენტის დღევანდელ სესიაზე საკანონმდებლო პაკეტზე მსჯელობა, რომელიც ნარკოპოლიტიკის ლიბერალიზაციას გულისხმობს, არ გაიმართება.
ფრაქცია ,,ქართული ოცნების“ თავმჯდომარის მამუკა მდინარაძის განცხადებით, აღნიშნულ საკანონმდებლო პაკეტთან დაკავშირებით მმართველ გუნდში აზრთა სხვადასხვაობაა.
როგორც მდინარაძემ ჟურნალისტებთან საუბრისას აღნიშნა, საკითხის პლენარულ სესიაზე გატანა მას შემდეგ მოხდება, როცა კონსენსუსი იქნება მიღწეული.
„არასოდეს დამიმალავს ის, რაც სინამდვილეში ხდება. საკითხზე მმართველ გუნდში აზრთა სხვადასხვაობაა. საერთო წესზე ვთანხმდებით, რომ ნარკოპოლიტიკა ლიბერალური უნდა იყოს. მომხმარებლების მიმართ რამდენადაც ლიბერალური უნდა ვიყოთ, გამსაღებლების მიმართ ამდენად მკაცრები უნდა ვიყოთ. კონკრეტულ საკითხებთან მიმართებაში, მაგალითად, როცა საკონსტიტუციო სასამართლომ ერთი დაადგინა და მთავრობამ ნარკოპოლიტიკის მიმართ კიდევ უფრო გაფართოებული მიდგომა შემოგვთავაზა, ვცდილობთ, რომ საერთო კონსენსუსი იყოს ჩამოყალიბებული და საკითხი სესიაზე ასე გავიტანოთ. ამის გადადება ამიტომ მოხდა. ვფიქრობთ, რომ კონსენსუსი მიღწევადია“, - განაცხადა მამუკა მდინარაძემ.
საკანონმდებლო პაკეტი პარლამენტში იუსტიციის სამინისტროს მიერ არის ინიცირებული და ის ნარკოპოლიტიკის ლიბერალიზაციას გულისხმობს.
