”ევროპული საქართველო” და ”დემოკრატიული მოძრაობა” სავარაუდოდ, დღეს, სახელმწიფო საკონსტიტუციო კომისიის დატოვების თაობაზე განცხადებას გააკეთებენ.
როგორც ”ინტერპრესნიუსს” ”ევროპული საქართველოს” წევრმა, დეპუტატმა, გიორგი ტუღუშმა განუცხადა, კომისიის შემადგენლობის დატოვების თაობაზე კონსულტაციები მიმდინარეობს კომისიის წევრ სხვა პარტიებთან და შესაძლებელია განცხადება ერთობლივად გაკეთდეს.
ტუღუშის თქმით, არის რამდენიმე პრინციპული საკითხი, რაზეც ოპოზიციური პარტიები პოზიციის შეცვლას არ აპირებენ და რომელთა გათვალისწინებას “ქართული ოცნება” არ აპირებს. ამ კონტექსტში ტუღუში მანდატების განაწილების წესს და პრეზიდენტის ირიბი წესით არჩევის საკითხს ასახელებს. მისივე თქმით, „ევროპული საქართველო“ საკონსტიტუციო კომისიის სამუშაო ჯგუფის დღევანდელ შეხვედრაში მონაწილეობას მიიღებს.
პოლიტიკური გაერთიანება ”დემოკრატიული მოძრაობის” წევრის, დიმიტრი ლორთქიფანიძის შეფასებით კი, მმართველმა გუნდმა საკონსტიტუციო ცვლილებებთან დაკავშირებით არც ერთი ის წინადადება არ გაითვალისწინა, რომელიც კომისიას დემოკრატიულმა მოძრაობამ შესთავაზა.
”კომისიის შეკრების პირველივე დღიდან ჩვენ ვამბობდით, რომ გვქონდა წითელი ხაზები, მათ რიცხვში იყო საარჩევნო სისტემის ცვლილება, რომლის დაუკმაყოფილებლობის შემთხვევაში კომისიას გამოვუცხადებდით უნდობლობას და გავაკეთებდით განცხადებას ბოიკოტის თაობაზე. ასევე წითელ ხაზებში ექცეოდა პრეზიდენტის ინსტიტუტის არჩევითობის საკითხი და მისი უფლებამოსილებები, უცხო ქვეყნის მოქალაქეებზე მიწების რეგისტრაციასთან დაკავშირებული საკითხი და საკონსტიტუციო სასამართლოს როლის გაზრდა. ოთხივე ამ საკითხზე ”დემოკრატიულმა მოძრაობამ” კომისიას საკონსტუტიციო ცვლილებების პროექტი შესთავაზა და ჩვენი არც ერთი შეთავაზება გაზიარებული არ არის. თუკი კომპრომისს ხელისუფლება ითხოვს ჩვენგან, მაშინ გვითხრან რა არის მათი მხრიდან კომპრომისი?!”, - განუცხადა „ინტრეპრესნიუსს“ დიმიტრი ლოთრქიფანიძემ.
”დემოკრატიული მოძრაობის” წარმომადგენელმა ხაზგასმით აღნიშნა, რომ საარჩევნო სისტემის მიმართულებით დაგეგმილი ის ცვლილება, რომლის მიღებასაც მმართველი პარტია აპირებს, სამართლიან არჩევნებს ვერ უზრუნველყოფს.
საკონსტიტუციო კომისია უკვე დატოვეს „ნაციონალური მოძრაობის“ და „სახელმწიფო ხალხისთვის“ წევრებმა.
