ჩვენ ვეცდებით ხელისუფლებას არჩევნების პროცესში გაყალბების ელემენტების შეტანაში მაქსიმალურად შევუშალოთ ხელი, - ამის შესახებ ”ერთიანი ნაციონალური მოძრაობის” ლიდერმა, ნიკა მელიამ ჟურნალისტებს არასამთავრობო ორგანიზაციებთან შეხვედრის დასრულების შემდეგ განუცხადა.
როგორც ნიკა მელიამ აღნიშნა, დღევანდელ შეხვედრაზე მთავარი თემა მომავალი ადგილობრივი თვითმმართველობის არჩევნები იყო.
”ნაციონალურ მოძრაობას” ახალი შემადგენლობით პირველად აქვს შეხვედრა არასამთავრობო ორგანიზაციებთან, ამ ფორმატში. ჩვენ ვისაუბრეთ ყველა ასპექტზე, რაც ქვეყანაშია პრობლემური. ძირითადი სასაუბრო თემა იყო კარს მომდგარი არჩევნები. იმის გათვალისწინებით, თუ რა პრობლემები იყო უკანასკნელ არჩევნებზე, გვინდა მოხდეს მათი ინფორმირება წინასწარვე, რათა ადგილობრივი არჩევნების სპეციფიკიდან გამომდინარე, მაქსიმალურად ხელი შევუშალოთ ხელისუფლებას არჩევნების პროცესში გაყალბების ელემენტების შეტანისგან”, -განაცხადა ნიკა მელიამ.
”ერთიანი ნაციონალური მოძრაობისა” და არასამთავრობო ორგანიზაციების შეხვედრა NDI-ის მიერ არის ორგანიზებული. შეხვედრას ესწრებიან ”მრავალეროვანი საქართველო”, ”საქართველოს ახალგაზრდა იურისტთა ასოციაცია”, ”საქართველოს დემოკრატიული ინიციატივა”, ”საქართველოს ატლანტიკური საბჭო”, ”სამართლიანი სახელმწიფოსა და დემოკრატიის ცენტრი”.
