უახლოეს ხანში თბილისს განვითარების გენერალური გეგმა ექნება. მსგავსი სახის დოკუმენტი უკვე რამდენიმე ათწლეულია რაც არ შემუშავებულა. აპრილის ბოლოს დედაქალაქის საკრებულოში განსახილველად და დასამტკიცებლად შევა ორგანიზაცია“სითიინსტიტუტისაქართველოს“ მიერ მომზადებული გენგეგმის პროექტი და დედაქალაქის კანონმდებლებს მოუწეთ მის ავ-კარგიანობაზე მსჯელობა.

გენგეგმის წარმოდგენილი პროექტის ძირითად მიმართულებები ურბანისტმა ნიკო კახეთელიძემ საინფორმაციო სააგენტო „პირველთან“  საუბრისას შეაფასა. მანვე პროექტის ძირითად მიმართულებებზე ისაუბრა:

“განაშენიანების გენერალური გეგმა არის მთელი ქალაქის კონსტიტუცია, რადგან აქ  საუბარიაუკვე არსებულზე და მის განვითარებაზე. ეს შეეხება მშენებლობებს, სატრანსპორტო კვანძებს სხვა ტიპის საკომუნიკაციო თემებს. სწორედ ეს არის მთლიანობაში გენერალური გეგმა. გენერალური გეგმით კონკრეტულად რაღაც იზღუდება, რაღაცის წახალისება ხდება. თუმცა, გენერალური გეგმის საბოლოო ვარიანტი ვიდრე არ დაიდება, მიჭირს ამაზე საუბარი, რადგან ვხედავ, რომ ქალაქში ყოველდღიურად არის ცვლილებები“.

მისი თქმით, გენერალურ გეგმას მუშაობა გაუჭირდება:

„საერთოდ, მგონია, რომ გენერალურ გეგმას გაუჭირდება მუშაობა, რადგან საიდანაც აიღეს ათვლის წერტილი, იმის შემდეგ ძალიან ბევრი რამ შეიცვალა. მაგალითად, ქალაქის მერიამ შეზღუდვა დააწესა მრავალსართულიანი სახლების მშენებლობაზე ქალაქის ცენტრში, მაგრამ ამას აქვს დათქმა, თუ ვთქვათ ის კონკრეტული ფიზიკური თუ იურიდიული პირი აშენებს რამეს და მას შეუცვალა სტატუსი, ამ შემთხვევაში დაშვებულია აშენება. ეს არის ძალიან ცუდი, რაც ხშირად ხდება. მერია ამ საკითხს არ წყვეტს, არ იღებს საკუთარ თავზე გარკვეულ ვალდებულებებს და საკითხი სასამართლომდე მიჰყავს. იგივე შეიძლება ითქვას მ2-ზე, რომელიც შევიდა უნივერსიტეტთან არსებულ ფართზე. ამ კომპანიამ იქ უნდა გაჩეხოს ხეები და ააშენოს სახლი. ამბობენ, რომ სულ 3 ათას კვადრატულს ვიკავებთო, რაც აბსურდია.  ახლა ქალაქის ცენტრში მიდის მშენებლობები, რომელიც არანაირ ნორმას არ შეესაბამება“, - ამბობს კახეთელიძე.

ნიკო კახეთელიძე მიიჩნევს, რომ ახალ გენგეგმაში ურბანული და რეკრეაციული ზონების ურთიერთკავშირი აუცილებლად უნდა იყოს გათვალისწინებული:

„გენგეგმის ერთ-ერთი ავტორი ამბობს, რომ თბილისის შემოსასვლელთან, სადღაც დიღმის ჭალებში იგეგმება დიდი პარკის მშენებლობა, ეს ძალიან კარგია, მაგრამ ეს არ არის ქალაქში, სადაც ადამიანი უშუალოდ სუნთქავს, ამიტომ, ეს არის სასაცილო არგუმენტი. ქალაქში მოისპო სარეკრეაციო ზონა და ამ მხრივ უმძიმესი სიტუაციაა. ასევე, სარეკრეაციო ზონების გარდა აქ არის კომუნიკაციები, ამხელა სახლებს სჭირდება მომსახურება, ეს არის კანალიზაცია, სანიაღვრე, გაზი და ა.შ. ეს რომ მოაწყო ცალკე პრობლემაა, რომელიც დღეს არანაირი ნორმით არ კეთდება“, - აცხადებს ურბანისტი.

მისივე თქმით, თბილისის ცუდი განვითარება რაიონების დაცლას იწვევს, რადგან სოფლის მოსახლეობა ქალაქში ჩამოდის და ხდება სხვა სახელმწიფო:

„ჩვენ თუ არ შევზღუდეთ ამ სახლების მშენებლობა ქალაქში, მივიღებთ საშინელებას. საერთოდ, გენგეგმადე უნდა შეჩერებულიყო მშენებლობა. მერე ისიც საკამათო იქნებოდა შეიძლებოდა თუ არა კონრეტული სახლების მშენებლობა, ახლა ფაქტობრივად ქაღალდზე დაიწერა რომ არ შეიძლება, შეიზღუდა, მაგრამ ჩვენ ვხედავთ თუ რამდენი მშენებლობა მიდის ქალაქში“, - აცხადებს ნიკო კახეთელიძე.

ურბანისტის აზრით, გენგეგმა თბილისის ისტორიული უბნების კონსერვასიისა და რესტავრაციის მიმართულებებს უნდა ითვალისწინებდეს, მაგრამ გენგეგმა ამ საკითხს უნდა ითვალისწინებდეს, მაგრამ გენგემის ავტორი ვერ იტყვის კონკრეტული ისტორიული შენობა ან ძეგლი როგორ უნდა გააკეთო, უნდა გაუკეთო მას კონსერვაცია თუ განავითარო, რადგან ეს სხვა კვლევის საგანია.

თუ რამდენად პასუხობს არსებული დოკუმენტი ბიზნეს გამოწვევებს, ანუ არსებული ბიზნესზონების განვითარებას და ახალი ბიზნესზონების შექმნას, ნიკო კახეთელიძე პასუხობს, რომ:

„წესით, უნდა პასუხობდეს, რადგან ამ დროს უნდა იყოს გათვალისწინებული საქმიანი ქალაქის, კონკრეტულ უბანში საქმიანი ფუნქციის მატარებელი ზონების თემა. გენგეგმა არის კონსტიტუცია თუ როგორ უნდა მოიქცეს ქალაქი. დღეს ქალაქის განვითარება არის ჩვენი გადარჩენის საკითხი. როცა ახალ უბანს აშენებ იქ გაცილებით მარტივია თანამედროვე ტექნოლოგიების თემა, ჩვენ ამის დიდი ფუფუნება დღეს არ გვაქვს. ჩემი აზრით, ჩვენი გენგეგმა არის მეხანძრის ფუნქციის მატარებელი. რომ მან გადაარჩინოს ის რაც გაფუჭებულია.

ის, თუ რამდენად დამაკმაყოფილებელია გენგეგმაზე მუშაობის პროცესში საზოგადოების დაინტერესებული ჯგუფების ჩართულობა, ურბანისტი ამბობს, რომ:

„უსაგნო საუბარი არ მჩვევია. არ ვარ იმ ადამიანის ტიპი, რომელიც, ვთქვათ, რაღაცას მოიგონებს თავისი პოლიტიკური მიზნების და ამბიციების გამო. მე რასაც ვხედავ, ვსაუბრობ იმაზე. ამიტომ, ჯერ არ ვიცი, რას დადებენ. თვითონ ის ადამიანები, ვინც ამ გენგეგმას აკეთებენ ნამდვილად არიან სპეციალისტები, მაგრამ რა პრესის ქვეშ იქნებიან ისინი, საბოლოო ჯამში, არვიცი“, - აცხადებს ნიკო კახეთელიძე.