მე ვერ გავიზიარებ შეხედულებას, რომ არ მოინახა მმართველ გუნდსა და პრეზიდენტს შორის თანაკვეთის წერტილი, - ამის შესახებ ვიცე-პრემიერმა, განათლებისა და მეცნიერების მინისტრმა ალექსანდრე ჯეჯელავამ ”პალიტრანიუსის” გადაცემაში ”360 გრადუსი” განაცხადა, როდესაც უპასუხა კითხვას, რომლის მიხედვითაც, ბოლო პერიოდში ერთი შეხების წერტილიც ვერ მოიძებნა პრეზიდენტსა და მმართველ გუნდს შორის, რაზეც საერთო პოზიციას ჩამოაყალიბებდნენ. 
როგორც ჯეჯელავამ განმარტა, მედიის ინტერესი კონცენტრირებულია იმ შემთხვევებზე, როდესაც ასეთი თანაკვეთა არ მოინახება. 
”არის ძალიან ბევრი კანონი, მათ შორის განათლების მიმართულებით. ჩვენ გვქონდა კონსულტაციები მათ შორის პრეზიდენტის ადმინისტრაციასთან და ძალიან წარმატებით. იმის თქმა, რომ ვერასდროს, ვერც ასეთი თანაკვეთა ვერ მოინახა, არასწორი იქნება. ასეთი თანაკვეთა ზოგ შემთხვევაში შედარებით ადვილად მოინახა, ზოგ შემთხვევაში რთულად და ზოგ შემთხვევაში ვერ მოინახა. მე არ ვხედავ ამაში ძალიან ნეგატიურ პროცესს, თორემ ასე შევაფასებდი”, - განაცხადა ჯეჯელავამ.
კითხვაზე, ოპოზიციასთან მეტი თანხვედრა ხომ არ აქვს ბოლო პერიოდში პრეზიდენტს, ჯეჯელავამ განაცხადა, რომ ”მედიით აქტიურად გაშუქებულ საკითხებში ნამდვილად ასეა”, ოღონდ იმიტომ კი არა, რომ ეს ასეა სტატისტიკურად, არამედ იმიტომ, რომ მედიას სწორედ ის შემთხვევა აინტერესებს ყველაზე მეტად.
”10 თვეა რაც სახელმწიფო სამსახურში ვარ და არ მახსენდება შეკითხვა მედიის მხრიდან, რას ვფიქრობ პრეზიდენტის მიერ წარმატებით დამტკიცებულ კანონპროექტზე. ასეთი შეკითხვა არ ყოფილა და ვეტოდადებულზე, რა თქმა უნდა, შეკითხვები მრავლად არის”, - განაცხადა ჯეჯელავამ.