„ახალგაზრდა ფინანსისტთა და ბიზნესმენთა ასოციაციის ანალიტიკოსი ზურა კუკულაძე აცხადებს, რომ თბილისის განაშენიანების გენერალურ გეგმაზე მუშაობა გამჭვირვალედ არ მიმდინარეობს.

მისი თქმით, აღნიშნული პროექტის საზოგადოების გარეშე შედგენა, არ არის მართებული.

„ფაქტია, რომ პროცესი მიდის გაუმჭვირვალედ, რაც უკვე არის დარღვევა. არ შეიძლება ჩვენ ვიღებდეთ  დოკუმენტს, რომელმაც უნდა განსაზღვროს ამ ქალაქში და ქვეყანაში თაობების ყოველდღიურობა და მის შესახებ ორი სამი კვალიფიციური ურბანისტის პოზიცია არ იყოს ცნობილი. მხოლოდ იმ ორგანიზაციის წარმომადგენლების არგუმენტების მოძიებაა შესაძლებელი, რომელიც თავადაა გეგმის ავტორი, ეს არ არის დისკუსია, ეს არის დაინტერესებული მხარის ძალიან ზედაპირული განმარტებები“,- აცხადებს კუკულაძე.

„აფბას“ ანალიტიკოსის განცხადებით, საინტერესოა, რა გამოცდილების ორგანიზაციაა „სითი ინსტიტუტი საქართველო“, რომელმაც რამდენიმე მილიონად ღირებული დოკუმენტი მოამზადა.

„ეჭვებს აჩენს ის ფაქტი, რომ ორგანიზაცია ამ დაკვეთის მიღებამდე რამდენიმე თვით ადრე დარეგისტრირდა. არ ვიცი, როგორ მოახერხა გამოცდილების არმქონე ორგანიზაციამ ამხელა მნიშვნელობის დოკუმენტის მომზადებაზე უფლების მოპოვება, ეს მეთოდები  ძალიან გავს ყოფილი ხელისუფლების დროინდელს. სხვას ამ ეტაპზე ვერაფერს ვიტყვი“,-აცხადებს კუკულაძე.

„აფბა“ აპირებს, რომ ჩაერთოს აღნიშნულ პროექტში და თავად მოახდინოს საკითხის შესახებ დისკუსიების ინიცირება.

„ვინაიდან წარმოდგენილი მიწათსარგებლობის გენერალური გეგმის, როგორც შინაარსი, ასევე, მისი მიღების ფორმა ძალიან ბევრ კითხვის ნიშანს ბადებს, ჩვენი ორგანიზაცია, - „აფბა“ ჩაერთვება პროცესში და თავად მოახდენს საკითხის შესახებ დისკუსიის ინიცირებას. ჩვენ დავიწყებთ საზოგადოებრივი მონიტორინგის პროცესს და სხვა არასამთავრობო ორგანიზაციებსაც, ასევე ექსპერტებსაც მოვუწოდებთ, რომ შემოგვიერთდნენ“,-აცხადებს კეკულაძე.

ახლო მომავალში თბილისს ახალი გენერალური გეგმა უნდა ჰქონდეს, დედაქალაქის მერიის დაკვეთით, დოკუმენტზე კომპანია „სითი ინსტიტუტი საქართველო“ 2015 წლიდან მუშაობს. მედიაში გავრცელებული ინფორმაციით, თბილისის განაშენიანების გენერალურ გეგმაში ძირითადი ყურადღება ეკოლოგიისა და გამწვანების პრობლემებს მიექცევა.