საპარლამენტო უმცირესობა ე.წ. ფარული მოსმენებთან დაკავშირებული კანონმდებლობის საკონსტიტუციო და სტრასბურგის სასამართლოებში გასაჩივრებას არ გამორიცხავს.
„ევროპული საქართველო“ ე.წ. ფარულ მიყურადებასთან დაკავშირებულ საკითხზე სამომავლო გეგმის დასახვის მიზნით არასამთავრობო ორგანიზაციებთან და პოლიტიკურ პარტიებთან შეხვედრებს მართავს. დეპუტატები ასევე გეგმავენ პრეზიდენტთან შეხვედრას, ვინაიდან მიიჩნევენ, რომ მმართველი გუნდის მიერ მიღებულ ახალი კანონმდებლობის საწინააღმდეგოდ გამოყენებულ უნდა იქნას ყველა სამართლებრივი ბერკეტი, პრეზიდენტის ვეტოს ჩათვლით.
„ქართული ოცნება“ საკონსტიტუციო სასამართლოს, არასამთავრობო ორგანიზაციების, პოლიტიკური პარტიების, საქართველოს პრეზიდენტის ფაქტობრივად ერთიანი პოზიციის მიუხედავად, მხოლოდ და მხოლოდ რიცხობრივი უპირატესობის ბოროტად გამოყენებით, ცდილობს, ე.წ.ფარულ მოსმენებთან დაკავშირებული კანონპროექტი აქციოს კანონად და უკანონო მოსმენების შესაძლებლობა კვლავ სუს-ს მისცეს. სწორედ ამიტომ, ახლა მნიშვნელოვანია, რომ ეს ადამიანები გავერთიანდეთ, გვქონდეს ერთიანი პოზიცია შემდგომ ნაბიჯებთან დაკავშირებით. ახლა არასამთავრობოებს შევხვდებით, შემდგომ გვექნება კონსულტაციები სხვა პოლიტიკური პატრიებთან, ვგეგმავთ, მათ შორის, გარკვეული ტიპის კონსულტაციებს საქართველოს პრეზიდენტთან და იმედი გვაქვს, რომ ჩვენ შევჯერდებით ერთიან პოზიციაზე, თუ როგორი უნდა იყოს ჩვენი დამოკიდებულება და შემდგომი ნაბიჯები „ქართული ოცნების“ ამ ანტიკონსტიტუციურ გადაწყვეტილებასთან დაკავშირებით“, - განუცხადა ჟურნალისტებს საპარლამენტო უმცირესობის წევრმა ირაკლი აბესაძემ.
მისი აზრით, გამოყენებული უნდა იყოს ყველა სამართლებრივი შესაძლებლობა, რაც პირველ რიგში გულისხმობს პრეზიდენტის მიერ ე.წ. ფარულ მოსმენებთან დაკავშირებულ საკანონმდებლო პაკეტზე ვეტოს დადებას, შემდგომ კი საკონსტიტუციო სასამართლოში ან ადამიანის უფლებათა ევროპულ სასამართლოში გასაჩივრებას.
„ევროპული საქართველოს“ კიდევ ერთი წევრის, დავით ბაქრაძის თქმით, უკანონო მოსმენები რჩება მნიშვნელოვან პრობლემად ქვეყანაში, ვინაიდან ახალი კანონით, რომლის მიღებასაც უმრავლესობა აპირებს, სიტუაცია არათუ არ გაუმჯობესდება, არამედ გაუარესდება.
„ამიტომ ჩვენი ამოცანაა ეს პროცესი გაგრძელდეს და საზოგადოებამ კვლავაც აღიმაღლოს ხმა, რომ მას უკანონოდ უსმენენ და უთვალთვალებენ. კანონის მიღება არ ნიშნავს, რომ საკითხი მოგვარებულია. პრობლემა მოხსნილი არ არის და ჩვენ ვიმსჯელებთ მომავლის გზებზე - როგორ უნდა გავაგრძელოთ ჩვენი აქტივობა და რა ნაბიჯები უნდა გადავდგათ იმისთვის, რომ დღეს თუ ვერა, მომავალში მაინც აუცილებლად ვაიძულოთ ხელისუფლება, ქვეყანაში ერთხელ და სამუდამოდ, წერტილი დაესვას უკანონო მოსმენების და თვალთვალის პრაქტიკას“, - განაცხადა დავით ბაქრაძემ.
