საქართველოს პრემიერ-მინისტრი გიორგი კვირიკაშვილი მიუნხენის უსაფრთხოების 53-ე კონფერენციის ფარგლებში არაბულ სახელმწიფოთა ლიგის გენერალურ მდივანს აჰმედ აბულღეითს შეხვდა.
როგორც „ინტერპრესნიუსს“ საქართველოს მთავრობის ადმინისტრაციის პრესსამსახურიდან აცნობეს, შეხვედრაზე საუბრის მთავარი თემა იყო ბოლო წლების განმავლობაში არაბულ სახელმწიფოებთან მთელ რიგ სფეროებში თანამშრომლობის გაძლიერების მიმართულებით გადადგმული ნაბიჯები, მათ შორის - დიპლომატიური ურთიერთობების გაფართოება და ეკონომიკური თანამშრომლობის გაძლიერება. გიორგი კვირიკაშვილმა საუბრისას ხაზი გაუსვა სავაჭრო-ეკონომიკური ურთიერთობების შემდგომი გააქტიურების მნიშვნელობას.
პრემიერ-მინისტრმა არაბულ სახელმწიფოთა ლიგას საქართველოს ტერიტორიული მთლიანობისა და სუვერენიტეტის ურყევი მხარდაჭერისთვის მადლობა გადაუხადა და გენერალური მდივანი აჰმედ აბულღეითი საქართველოში მიიწვია.
