რაც განვაცხადე, იგივეს ვიმეორებ დღესაც და მაქვს საფუძველი, როცა ამ განცხადებას ვაკეთებ, ცრუ განცხადება არავის გაუკეთებია, - ამის შესახებ პარლამენტის ადამიანის უფლებათა კომიტეტის თავმჯდომარე ეკა ბესელიამ დაკავებული დეკანოზის საქმის კომენტირებისას განაცხადა.

ეკა ბესელიას თქმით, ბოდიში არა პრემიერ-მინისტრმა და იუსტიციის მინისტრმა უნდა მოიხადონ იმ განცხადებებისთვის რაც გააკეთეს, არამედ იმ ადამიანებმა, რომლებიც ამ თემით სპეკულირებენ.

“მინდა მივმართო „რუსთავი 2“-ს და ყველა იმ ადამიანს, რომელიც შეეცდება, რომ ამ საქმის პოლიტიკური სპეკუალცია დაიწყოს, ეს არ არის ის საქმე, რომელზეც შეიძლება ჩვენ პოლიტიკური კამპანია და პოლიტიკური დებატები გავაჩაღოთ. ის განცხადებები, რაც ამ საქმესთან დაკავშირებით გაკეთდა, გაკეთდა ზუსტად იმ ვითარებისა და რეალობის გათვალისწინებით, რაც წინ უძღოდა ამ განცხადებების გაკეთებას. იგივე შემიძლია გავიმეორო დღეს და ჩემთვის შოკისმომგვრელია, როცა ვისმენ ასეთ ცინიკურ შეფასებებს ცალკეულ შემთხვევებში, ეს სრულიად დაუშვებლად მიმაჩნია, როცა საქმე ეხება საქართველოს ეკლესიას, კათოლიკოს-პატრიარქის ჯანმრთელობას, მის უსაფრთხოებას და ისეთ საკითხებს, რომლებიც არის მგრძნობიარე და ფაქიზი. ამ საკითხის გაუბრალოება და ცინიკური განცხადებების მოსმენა, რომ თურმე ბოდიში უნდა მოიხადოს პრემიერმა და იუსტიციის მინისტრმა და დეპუტატებმა, ასე არ არის. ბოდიში უნდა მოიხადონ მათ, ვინც ამ თემაზე სპეკულაციებს აკეთებენ. ჩემი სტატუსიდან და ვალდებულებებიდან გამომდინარე, ცოტა იმაზე მეტი ინფორმაცია მაქვს, ვიდრე ამაზე ვსაუბრობ. რაც განვაცხადე იგივეს ვიმეორებ დღესაც და მაქვს საფუძველი, როცა ამ განცხადებას ვაკეთებ“, - განაცხადა ბესელიამ და დასძინა, რომ ის არ უარყოფს არც ერთ განცხადებას, რომელიც ამ საკითხზე გაუკეთებია.

„დაველოდოთ გამოძიებას, თქვენ ხომ არ იცით, რა მასალები აქვს გამოძიებას“, - აღნიშნა ბესელიამ.

კითხვაზე, კვლავ ფიქრობს თუ არა, რომ საქმე ეხებოდა პატრიარქის უსაფრთხოებას და ჯანმრთელობას, ბესელიამ უპასუხა, რომ “იგივე აზრზე რჩება, რა განცხადებაც გააკეთა“. დეპუტატი მიიჩნევს, რომ პროკურატურის მხრიდან ბევრი გარემოების გასაჯაროება არ ხდება, რადგან გამოძიების ინტერესებს არ შეეშალოს ხელი. ეკა ბესელია ყველას ურჩევს, დაელოდოს გამოძიების დასრულებას და პატრიარქის ჩამობრძანებას საქართველოში.

“მე მაქვს ჩემი ინფორმაციებიც, ფაქტებიც. ჩემი სტატუსიდან გამომდინარე. მაქვს იმაზე მეტი ინფორმაცია, ვიდრე ვსაუბრობ“, - აღნიშნა ბესელიამ.