საკონსტიტუციო სასამართლო, როგორც კონსტიტუციური მართლმსაჯულების ორგანო არის დამოუკიდებელი და ეს ძალიან მნიშვნელოვანია, - ასე უპასუხა საკონსტიტუციო სასამართლეობის მოსამართლეობის კანდიდატმა, დეპუტატმა მანანა კობახიძემ უმცირესობის წევრ გიორგი ტუღუშის მიერ დასმულ კითხვას.
ფრაქცია ”ევროპული საქართველოს” წევრი დაინტერესდა, ეთანხმებოდა თუ არა კობახიძე საკონსტიტუციო სასამართლოს გადაწყვეტილებას, რომელმაც საკონსტიტუციო სასამართლოს შესახებ ორგანული კანონი და სამართალწარმოების შესახებ კანონში ცვლილებები არაკონსტიტუციურად სცნო.
”რაც შეეხება საკონსტიტუციო სასამართლოს შესახებ ორგანულ კანონში და სამართალწარმოების შესახებ კანონში ცვლილებებს, ვიტყვი, რომ ის რომ სასამართლომ ივნისში, პარლამენტის მიერ მიღებული კანონი ცნო არაკონსტიტუციურად, ეს კიდევ ერთი დადასტურებაა, რომ ამ ქვეყანაში საკონსტიტუციო სასამართლო, როგორც კონსტიტუციური მართლმსაჯულების ორგანო არის დამოუკიდებელი და ეს ძალიან მნიშვნელოვანია. უპრეცედენტოდ მნიშვნელოვან საკითხებზე გამოიტანა გადაწყვეტილებები ბოლო ოთხი წლის განმავლობაში, წარდგინებებიც კი არ არსებობდა კანონებთან დაკავშირებით. საკონსტიტუციო სასამართლოს მუშაობის პრაქტიკა, მიღებული გადაწყვეტილებები, გადაწყვეტილებების დასაბუთებულობა, მათი რაოდენობა, მიუთითებს, რომ მხოლოდ და მხოლოდ დამოუკიდებლობის ხარისხის გაზრდაზე შეიძლება იყოს საუბარი და არამც და არამც შესუსტებაზე”, - განაცხადა მანანა კობახიძემ.
კობახიძემ გიგი უგულავას საქმე და საკონსტიტუციო სასამართლოს გადაწყვეტილება გაიხსენა.
დეპუტატი თავს იკავებს დააფიქსიროს პოზიცია იმ საკითხთან დაკავშირებით, თუ რას ფიქრობს თავად, ეთანხმება თუ არა საკონსტიტუციო სასამართლოს გადაწყვეტილებას.
”მე რას ვეთანხმები და რას არა, შეგნებულად ვიკავებ თავს ამის დაფიქსირებისგან. ეს კანონი რომ ხვალ ისევ გასაჩივრდეს, მე არ მინდა, რომ წინასწარ აზრი მქონდეს გამოთქმული რომელიმე ცვლილებასთან დაკავშირებით. რაც შეეხება თავის დროზე რატომ დავუჭირე მხარი ამ კანონის მიღებას, მაშინ ჩავთვალე, რომ არ უნდა დაგვეძლია პრეზიდენტის ვეტო, უნდა გაგვეზიარებინა. რატომ გაიზიარა სასამართლომ მოსარჩელეთა რეკომენდაციები ეს მათი საქმეა. შესაძლოა, მე რომ იქ ვმჯდარიყავი, მეც გამეზიარებინა მათი პოზიცია და ეს ჩვეულებრივი პროცესია”, - აღნიშნა კობახიძემ.
