პარლამენტის თავმჯდომარე ირაკლი კობახიძე დარწმუნებულია, რომ ხვალ ევროპარლამენტი საქართველოს ვიზალიბერალიზაციაზე დადებით გადაწყვეტილებას მიიღებს. ამის შესახებ ირაკლი კობახიძემ ბრიუსელში, ევროპის სოციალისტური პარტიის პრეზიდენტთან, სერგეი სტანიშევთან შეხვედრის შემდეგ ჟურნალისტებს განუცხადა.
როგორც კობახიძემ აღნიშნა, ძალიან საინტერესო დისკუსია გაიმართა სხვადასხვა თემაზე, პირველ რიგში კი საუბარი ვიზალიბერალიზაციის საკითხს შეეხო.
”პირველ რიგში შევეხეთ იმ მოვლენას, რომელიც ისტორიულია ჩვენთვის. ხვალ კენჭი უნდა ეყაროს საკითხს, რომელიც მნიშვნელოვანია თითოეული ჩვენი მოქალაქისთვის, ეს არის ვიზალიბერალიზაციის საკითხი. ამ საკითხთან დაკავშირებით ვისაუბრეთ. ძალიან ბევრი რამე გაკეთდა ჩვენი მხრიდან, ხელისუფლების მხრიდან იმისათვის, რომ ეს შედეგი მიღწეულიყო. დარწმუნებული ვართ, ეს ყველაფერი ხვალ წარმატებით დასრულდება, ევროპარლამენტი კენჭს უყრის ამ საკითხს და დადებით გადაწყვეტილებას მიიღებს”, - განაცხადა კობახიძემ.
როგორც კობახიძემ აღნიშნა, სერგეი სტანიშევთან განიხილეს საკითხები, რომელიც დაკავშირებულია შიდა რეფორმებთან. ”გვქონდა ასევე საუბარი ეკონომიკურ და სოციალურ რეფორმებზე, ამ სფეროში გასატარებელ ღონისძიებებზე. მთლიანობაში ძალიან საინტერესო დისკუსია იყო. კიდევ ერთხელ მადლობა მინდა გადავუხადო ევროპელ სოციალისტთა პარტიას, ასევე პირადად ბატონ სტანიშევს მათი მხარდაჭერისთვის ვიზალიბერალიზაციის სფეროში, ევროპული ინტეგრაციის სფეროში.
ასევე მინდა მადლობა გადავუხადო იმ მხარდაჭერისთვის, რომელსაც ის აღმოუჩენს პარტია ”ქართულ ოცნებას”. ჩვენ ვართ ამ ევროპული ოჯახის წევრები და ჩვენი თანამშრომლობა არის ძალიან მნიშვნელოვანი”, - განაცხადა ირაკლი კობახიძემ.
