თუ ჩემი ბრალეულობა იქნება, მზად ვარ, ციხეში ჩავჯდე, - ასე უპასუხა სავაჭრო ცენტრ „ბავშვთა სამყაროს“ დირექტორმა გიორგი მაჭავარიანმა ხანძრის განზრახ გაჩენის თაობაზე აქციონერების ნაწილის მიერ მის მიმართ გამოთქმულ ბრალდებებს.

როგორც მაჭავარიანმა ჟურნალისტებს განუცხადა, პირიქით, მას აქვს ეჭვი, რომ მოხდა დივერსია, ვინაიდან „ამხელა ტერიტორია ასე მარტივად დაიწვა“.

„თუ ჩემი ბრალეულობა გამოიკევეთება, მზად ვარ ციხეში ჩავჯდე. გაყიდვას არ ვაპირებდი, პირიქით, 1,5 მილიონი დავხარჯეთ ამ შენობის რემონტისთვის. გამოძიება დაადგენს ყველაფერს, თავს არ ვიმართლებ. ნულზე დავჯექი მთლიანად და ჩემი თავის მტერი ხომ არ ვარ? - ვიყიდე აქციები, 5%-ის მფლობელი ვარ და აქციების ყიდვას ვაგრძელებდი. პირიქით, ეჭვი მაქვს დივერსიის, რადგან ასე მარტივად დაიწვა ამხელა ტერიტორია“, - განაცხადა მაჭავარიანმა.

რაც შეეხება გამოთქმულ ბრალდებებს და ეჭვებს, რომ შესაძლოა მომხდარ ხანძართან დაკავშირებით ახალი ოქროს ბირჟის მფლობელების ინტერესები იკვეთებოდეს, მაჭავარიანს ასეთი ეჭვები არ აქვს და აცხადებს, რომ პირიქით, ახალი ოქროს ბირჟის მფლობელებთან მეგობრული ურთიერთობა აქვს.

მისივე თქმით, ბიძინა ივანიშვილი სავაჭრო ცენტრის მეწილე არ არის.