ფრაქცია ”ქართული ოცნების” თავმჯდომარე მამუკა მდინარაძე პროპორციულ საარჩევნო სისტემაზე გარკვეული დათქმებით გადასვლას მხარს უჭერს.
როგორც მდინარაძემ ჟურნალისტებს საკონსტიტუციო კომისიის სამუშაო ჯგუფის სხდომის დაწყებამდე განუცხადა, ეს უნდა მოხდეს დემოკრატიული ქვეყნების მაგალითის საფუძველზე.
”პროპორციულ სისტემაზე გარკვეული დათქმებით გადასვლის მომხრე ვიქნები. დემოკრატიული ქვეყნების მაგალითები უამრავია, რასთან დაკავშირებითაც შეგვიძლია ვიმსჯელოთ და მივიღოთ გადაწყვეტილება. თუ არ იქნება მაჟორიტარული სისტემა, ავიღოთ რომელიმე ქვეყნის მაგალითი, ან მიმსგავსებული მაგალითი, რათა ჩვენ არ გამოვიგონოთ ახალი ველოსიპედი და გვქონდეს საკონსტიტუციო რეფორმა, რომლის ფარგლებშიც თუ იქნება მაჟორიტარული სისტემიდან პროპორციულზე გადასვლა, შეიქმნას გარანტიები, რომ ეს არ გამოიწვევს კრიზისს და გაურკვევლობას”, - განაცხადა მამუკა მდინარაძემ.
რაც შეეხება საარჩევნო ბარიერის დაწევას, მდინარაძე მიიჩნევს რომ 5%-იანი ბარიერის დაწევა სწორი არ იქნება.
”ბარიერის დაწევას არ ვეთანხმები. ეს გარკვეულ პრობლემებს ქმნის და ამის პრეცედენტი უამრავია მსოფლიოში. აქედან გამომდინარე, ეს არის ერთ-ერთი არგუმენტი, რის გამოც არ ვეთანხმები 5%-იანი ბარიერის დაწევას”, - განაცხადა მდინარაძემ.
