პრემიერ-მინისტრს ჰყოფნის თავხედობა თავს დაესხას საზოგადოების ნაწილს, რომელიც იბრძვის გია ცერცვაძის გასათავისუფლებლად, - ასე გამოეხმაურა ”ნაციონალური მოძრაობის” ერთ-ერთი ლიდერი ნიკა მელია პრემიერ-მინისტრის განცხადებას, რომელმაც ცერცვაძის საქმესთან დაკავშირებით ”ნაციონალური მოძრაობა” გააკრიტიკა.
როგორც მელიამ აღნიშნა, პრემიერ-მინისტრის ეს დამოკიდებულება არის იმის მანიშნებელი, რომ ამ ქვეყანას არ ჰყავს ხელისუფლება, რომელიც მზად არის დაიცვას თავისი ქვეყნის მოქალაქეები.
”მაშინ, როდესაც მთელი საზოგადოება კონსოლიდირებულია და ერთ მუშტად არის გაერთიანებული გია ცერცვაძის გარშემო, რათა რამენაირად ადამიანი დაიხსნას ტყვეობიდან, სადაც ამ ხელისუფლების მოღალატეობრივი ქმედებების შედეგად აღმოჩნდა, გამოდის ივანიშვილის მთავრობის პრემიერი და ნაცვლად იმისა, რომ საზოგადოებას დაეხმაროს და ხმა აიმაღლოს ამ მოღალატეობრივი ქმედებების წინააღმდეგ, თავს ესხმის საზოგადოების ყველაზე აქტიურ ჯგუფს, რომელიც იბრძვის გია ცერცვაძის გასათავისუფლებლად. სწორედ ამ საზოგადოების აქტიურობის შედეგია ის, რომ დიდი ალბათობით გია ცერცვაძე გათავისუფლდება. პრემიერს ჰყოფნის თავხედობა, თავს დაესხას საზოგადოების ნაწილს, რომელიც იბრძვის გია ცერცვაძის გასათავისუფლებლად. ეს არის იმის მანიშნებელი, რომ ამ ქვეყანას არ ჰყავს ხელისუფლება, რომელიც მზად არის დაიცვას მისი მოქალაქეები. პირიქით, ეს ხელისუფლება იქცა საფრთხედ თითოეული მოქალაქისთვის”, - განაცხადა ნიკა მელიამ.
ისინი გვდებენ ბრალს სამხედროების უპატივცემულობაში, რომლებმაც 2008 წლის ომის მონაწილე თითქმის ნახევარი ჯარი ციხეში ამოალპეს და ციხეში ჩახოცეს, - ამის შესახებ საქართველოს პრემიერ-მინისტრმა გიორგი კვირიკაშვილმა უკრაინაში ქართველი ოფიცრის, გია ცერცვაძის დაკავების საკითხზე ოპოზიციის მხრიდან ხელისუფლების მისამართით გამოთქმულ კრიტიკაზე კომენტირებისას განაცხადა.
უფრო კონკრეტულად, კვირიკაშვილი გამოეხმაურა ოპოზიციონერების ბრალდებას, რომლებიც ხელისუფლებას გიორგი ცერცვაძის საქმეზე მოღალატეობრივ პოზიციაში ადანაშაულებენ.
