ევროპარლამენტის ყოფილი პრეზიდენტი მარტინ შულცი გერმანიის „სოციალ-დემოკრატიული პარტიის“ კანდიდატი იქნება გერმანიის ფედერალური კანცლერის პოსტზე, - განაცხადა „სოციალ-დემოკრატიული პარტიის“ ხელმძღვანელმა და გერმანიის ეკონომიკის მინისტრმა ზიგმარ გაბრიელმა. 
„მოხარული ვარ, რომ პრეზიდიუმმა ჩვენს წინადადებას ერთსულოვნად დაუჭირა მხარი“, - განაცხადა ზიგმარ გაბრიელმა. 
„მარტინ შულცი ის ადამიანია, რომელიც შეძლებს ხიდების აშენებას, ხალხის გაერთიანებას. მიხარია, რომ ამ საქმეს ხელი მოკიდა. დარწმუნებული ვარ, მას საუკეთესო შანსები აქვს კანცლერის პოსტზე“, - აღნიშნა გაბრიელმა.
გავრცელებული ინფორმაციით, შულცის კანდიდატურას კანცლერის პოსტზე პარტიის პრეზიდიუმი კვირას დაამტკიცებს. 
გერმანიაში საპარლამენტო არჩევნები 2017 წლის 24 სექტემბერს გაიმართება.