“ნაციონალური მოძრაობის“ წევრის, აკაკი მინაშვილის ინფორმაციით, პარტიიდან გასულ პირებს პარტია ოფიციალურად უკვე დატოვებული აქვთ და “ახლა პროცედურული ხრიკებისა და თაღლითობის გზას მიმართავენ“.

როგორც მინაშვილმა “ინტერპრესნიუსს“ განუცხადა, მათ ამის თაობაზე ინფორმაცია პარლამენტსა და შესაბამის კომიტეტს მიაწოდეს.

მინაშვილი დარწუნებულია, რომ პარტია “ნაციონალური მოძრაობიდან“ გასულ პირებს ფრაქციის დატოვება და ახალი ფრაქციის შექმნა აუცილებლად მოუწევთ.

“მათ 12 იანვარს ერთად გააკეთეს საჯარო განცხადება იმის შესახებ, რომ პარტიიდან გადიან და ახალ პარტიას ქმნიან. “ნაციონალური მოძრაობის“ წესდებით, ნებისმიერი სახის განცხადება პარტიიდან გასვლის შესახებ - წერილობითი თუ ზეპირი განცხადება, პარტიიდან გასვლად ითვლება. ეს ასე იყო პრაქტიკაშიც - ისინი, ვინც პარტიიდან გადიოდნენ, ამის შესახებ ზეპირ განცხადებას აკეთებდნენ და ეს განცხადება პარტიიდან გასვლად ითვლებოდა. საქმე იმაშია, რომ ფრაქცია, რომელიც პარლამენტში არსებობს, არის “ნაციონალური მოძრაობის“ ფრაქცია, რაც მათ ძალიან კარგად იციან, რომ ეს ასეა. უბრალოდ, დროებით, ვიდრე სიტუაცია გაირკვევა, სურთ, გამოიყენეონ ფრაქციასთან დაკავშირებული სიკეთეები. გუშინ, როცა ამ თემაზე კონსულტაციებზე საუბრობდნენ, ვინმემ მაშინ რაიმე გვკითხა, როცა სარჩევნო სიიდან ადამიანები ამოიღეს ან როცა ნიკა მელია გადაირჩიეს?! ამასთან დაკავშირებით რაიმე კოორდინაცია ჰქონდათ მათ ჩვენთან?! ახლა ვინც არიან “ნაციონალური მოძრაობიდან“ გასული უკვე უპარტიო დეპუტატები თუ პარტია “ევროპული საქართველოს“ წევრები, ფრაქცია უნდა დატოვონ მათ, რადგან ფრაქცია ეკუთვნის “ნაციონალურ მოძრაობას“. ამას ისიც ცხადყოფს, რომ “ნაციონალური მოძრაობის“ წევრებს ახალი ფრაქციის ფორმირება რომ მოუნდეთ, პარლამენტის ბიუროსგან უარს მიიღებენ, რადგან “ნაციონალური მოძრაობის“ ფრაქცია პარლამენტში უკვე არსებობს,“ - განუცხადა “ინტერპრესნიუსს“ აკაკი მინაშვილმა.